Congress party-in sorkar hnathawk tana an hmachhawpte an puang; Assembly-ah thluaka sum lut an ṭhut fur kan hlau - Lalsawta

Mizoram Pradesh Congress Committee (MPCC) president Lalsawta chuan February 11, Inrinni khan Aizawl Press Club-ah thuthar thehdarhtute kâwmin, sorkar hnathawkte tana an hmachhawpte a puang a; thluaka sum lût rual Assembly House-ah an ṭhut fur an hlauh thu a sawi.

MPCC President chuan, party ṭhenkhatte'n kumina inthlanpui awm tur chu sum ringa chak theih an inring nia sawiin, "Keini party chuan inthlan hma thla 10 vel chauh awmah hian kan ram mipuite'n candidate-te sum an hnâwl ngam chuan kan ramah rorelna ṭha nei turin a bul kan ṭanah kan ngai. Thla 10 chauh insûm turin mipui, a bikin kan party mite kan ngen a ni," a ti.

Congress party block leh unit-te chu candidate-te tihek lo mai ni loin, an tana inséng zawk tura an inngen thu sawiin Lalsawta chuan, "Ram rorelna ṭha nei turin kan inpek a ngai," a ti a, Mizoram mipui pawh an inhuam ve tur a nih thu a sawi.

MPCC President chuan, thluaka sum lut rual, an sum ngah vanga Assembly House-a an ṭhut fur an hlauh thu sawiin, "Chutiang a nih chuan kan ram tan a ṭha dawn lo tak zet. Huaisen taka sum kan hnâwl ngam chuan kan tan mai ni lo, kan tu leh fate tan ram rorelna ṭha kan nei thei dawn. Chumi atan chuan a bul ṭantu kan ni thei a ni," a ti.

MPCC president Lalsawta chuan, sorkar leibá a tam êm avangin sorkar piang tur tan rulh ngai tur a tam dawn tih sawiin, "Hei hi sorkar sum a nih angin dik taka hman a nih loh vang leh Planning Commission awm tâk loh hnua India ram sum enkawl dan danglam ta hriat fuh loh vang a ni. Sorkar sum hi mimal sum enkawl anga enkawl theih a ni," a ti a, Mizoram sorkar chu ngaih pawimawh hmasak tur hre loah a puh.

Sorkar hnathawk tana Congress party an hmachhawp chungchanga zawhna chhangin Lalsawta chuan, "Sum hi hman dik a nih chuan a daihzâi em em. Finance ka enkawl ve tawhna aṭangin thil tih theih a ni tih ka hria. Sum pûk a tam êm avangin kum hnih khat chhung chu kan duh angin kan kal thei lo mai thei," a ti.