KHAWTHLIR

Bial hmeichhe Inkhawmpui
Mizoram chhung leh páwna Presbyterian Kohhrana hmeichhe pawl, Kohhran Hmeichhiate chuan February 10, Zirtawpni aṭang khan pastor bial inkhawmpui an hmang. Inkhawmpuiah hian Inrinni khan rorel inkhawm neih a ni a, nizan khan inkhawmpui a ṭiak a ni.

Heroin man
Mizoram Police chuan February 11, Inrinni khan Lalmawizuala (23) s/o CV Thanga, Champhai Zion Veng nia insawi hnen aṭangin heroin gram 39 an man. February 10, 2023 pawh khan Special Narcotic Police Station mite'n Sihphir Mel 10-ah Lalfakzuali (32) d/o Lalrochhiara, Kolasib Diakkawn hnen aṭangin heroin gram 54.9 an man bawk.

UPC inkhawmpui
UPC (North East India) hnuaia Aizawl East District leh North Mizoram District chhunga pastor bial hrang hrangah February 10, 2023 zan aṭangin bial inkhawmpui neih a ni a, nizan khan a ṭiak. Inkhawmpuiah hian February 11, Inrinni chhun khan rorel inkhawm neih a ni.

Arts Festival
IPR department leh South Art Mizoram chuan vawiin hian Lungleiaah ni thum awh tur Arts Festival an buatsaih dawn. Festival-ah hian Lungleia lemziak thiam 25-te'n an lemziak leh kutchhuakte an pho chhuak dawn a; lehkhabu leh Mizo thil siam chhuahte zawrhna dawr bakah, face painting leh live mural painting-te a awm bawk ang.

LMC bial viltu tur puang
Congress party president Lalsawta chuan February 11, Inrinni khan Lunglei Municipal Council (LMC) inthlan turah an party aṭanga Assembly constituency pathuma bial (ward) viltu atana ruatte a puang. LMC bial viltu atana ruat MPCC President-in a puante chu - Lunglei West biala ward-te vil turin PC Lalthanliana, Lunglei South biala ward-te vil turin Dr RK Lallianthanga leh Lunglei East biala ward-te vil turin Joseph Lalhimpuia ruat an ni a; Lunglei North biala ward-te viltu tur puan tel a ni lo thung.

Centre hawng
Horticulture department hmalaknaa Thingsulthliaha din Ripening Chamber & Collection Center cum Manager Quarters chu February 11, Inrinni khan bialtu MLA R Lalzirliana, minister-in a hawng a, Aizawl mayor Lalrinenga Sailo pawh a tel. Hawnna inkhawmah hian Horticulture department leh Thingsulthliah VC-I ten thuthlung an ziak nghal a, Ripening Chamber chu balhla chíngtute'n ṭangkai taka an hman theih nan Thingsulthliah VC-I hnenah an hlan a ni.

Bialtu MLA hoin
Sikul thawm tha
Aizawl North-II bialtu MLA Dr Vanlalthlana chu February 11, Inrinni khan a bial chhunga Ramhlun Vengthar Primary School sak ṭhat hnatlangah a tel a, hnatlangte ei leh in senso atan Rs 2,000 a pe. Dr Vanlalthlana hian sikul sak ṭhatna atan Ramhlun Vengthar Branch YMA hnenah MLA fund a pe a, YMA chuan MLA fund behchhanin sikul thawm ṭhat hnatlang an ko a ni.