Japanese rinawmzia, an tumruhziate hi kan entawn tur a ni - IWR Minister

Irrigation and Water Resources (IWR) minister C Lalrinsanga chuan Sailam rama Lau lui minor irrigation project siam thar chu February 11, Inrinni khan loneitute hnenah a hlân. Minister chuan, Japan mite'n hna an thawh nasat dan te, hnaa an rinawm dante chu Mizote'n entawn se a duh thu a sawi.

IWR department chuan JICA Technical Cooperation Project (JICA TCP) hnuaiah department dang pathum - Land Resources, Soil & Water Conservation leh Horticulture leh Agriculture-te nena ṭangrualin Sailam rama Lau luiah minor irrigation an kalpui a ni. Project hnuaiah Sailam khuaa loneitute tan leilet châwmna tui kawng ṭha zawk siam a nih bakah, a panna kawng thawm ṭhat a ni a; thawh zawh a nih tawh avangin leilet neitu Charpui Water User Association hnenah IWR Minister-in a hlan a ni.

Lau lui minor irrigation project hi JICA TCP hnuaia siam a ni a; cheng nuai 58.90 hmangin Excel Consultancy Services-in siamin, February 26, 2019-a an thawh ṭan chu May 14, 2020-ah an zo. Water User Association-in chan neiin thawh tur ṭhenkhat an thawk ve bawk a, March 5, 2019-ah thawk ṭanin, January 30, 2020-ah an zo. Project pumpui siamna atan cheng nuai 67.275 hman a ni a, sum chu JICA-in an tum a ni.

IWR minister C Lalrinsanga chuan, JICA TCP hnuaiah hna tam tak thawh a nih thu sawiin, "Japan thiamna hmangin thiamna thar tam tak zir chhuah a ni a, kan hlâwkpui hle. Japan mithiamte'n Mizorama hna an rawn thawh dan leh hnaa an rinawmzia te, an tum a ruhzia leh ruah leh ni sáin an hna a tihkhaihlak ve ngai lohzia hi kan entawn tur a ni," a ti.

C Lalrinsanga chuan, Mizote chu Japanese-te nen hmel leh kimtlang inan viau laiin, hmasawnna lamah erawh chuan an inthlau hle tih sawiin, "A chhan bulpui ber chu kan rilru puthmang inang lo hi a ni. Japanese-te hmasawn châkna hi an rilruah a inṭan a, chu chu kan tih ve tur hmasa ber a ni," a ti a; rilruin hma lam a thlir a ngaih thu leh work culture her dik a ngaih thu a sawi.

Project inhlannaah hian khualzahawm Saito Mitsunori, JICA India chief representative pawhin thu a sawi a ni.