KHAWTHLIR

Aizawl DC chuan CrPC Section 144 tlawhchhanin thupek a chhuah a, Aizawl district páwn - district dang, state dang leh ram dang aṭangin vawk leh vawksa aṭanga thil siam reng reng Aizawl district chhungah lâk luh khap a nih thu a puang. Vawk lak luh khap chhan hi vawk natna PRRS leh African Swine Fever lêng mai theia ngaih vang a ni a, thupek hian January 14 aṭanga thla hnih chhung a awh ang.

Mizoram Police din champha lawm nan Mizoram Police Headquarters chuan nimin khan an hmunah blood donation camp an huaihawt a, Aizawl Civil Hospital tan thisen unit 42 pein, a petute mipa 37 leh hmeichhia panga an ni.

Serchhip DC thar Dr Lalzirmawia Chhangte chuan nimin khan a pisaah Serchhip district-a MJA member-te a kâwm. Bawrhsap chuan, thuthar thehdarhtute chu mipuite zirtirtu an nih avangin ngaih pawimawh hmasakah a nei tih sawiin, mipui rawngbawlna kawngah thawhhona ṭha tak an neih a beisei thu a sawi. Serchhip MJA president C Ramengmawia pawhin Serchhip district leh khawtlang hmasawnna turah theihtawp an chhuahpui dawn thu a sawi a ni.

Mizoram Lok Sabha MP C Lalrosanga chu January 14, Thawhlehni khan Raj Bhavan-ah a léng a, Governor PS Sreedharan Pillai nen an inkâwm. C Lalrosanga chuan Mizoram tana hmachhawp a neihte leh a hmalak tawhnate a sawi a; Mizoram tihhmasawnna tura ruahmanna ṭhenkhatte an sawi dûn bawk.

Lawngtlai Press Club chu kum 2020 atan nimin khan hawn ṭan a ni. Nimina a hawnna inkhawm, Lawngtlai MJA vice president Lalngheta Ralte kaihhruaiah president ZD Dengngura chuan, kum 2019 chhungin MJA member-te lungrual tak leh pheikhai rual takin ke an pên tih sawiin, "Thawhhona ṭha tak hnuaiah nasa takin hmasawnna kan hmu a ni. Kumin 2020-ah pawh mipui tana rawngbawltu kan nih anga theihtawp kan chhuah a, hma kan sawn zel a ngai a ni," a ti.