RT-PCR kháwl pek la hawng lo Sorkar sual lantirtu a ni - MPCC

Mizoram Pradesh Congress Committee (MPCC) Communication department chuan thuchhuah siamin, "Covid-19 hripui vei leh vei loh endikna man chawi a ngaih laia Lunglei Civil Hospital-a MLA Pu Zodintluanga Ralte-in RT-PCR kháwl a pek sorkarin hawn pawh a la hawng duh lo hi sorkar chak loh vang ni loin, sorkar sual an ni tih lantirtu a ni," an ti.

MPCC tarlan danin, Thorang bialtu MLA Zodintluanga, MPCC treasurer-in June 26, 2020-ah Covid-19 test-na kháwl RT-PCR chu Lunglei Civil Hospital-a hman turin a pe a; mahse, tun thlengin hman a la ni lo a, a fûnna pawh an la hawng lo. RT-PCR kháwl a thlàwna pek sorkarin a hman duh loh laiin, MNF kaihhruai sorkar chuan mipui rethei zawkte hnenah man chawia Covid-19 test tawh tur tiin ro a rel tih sawiin MPCC chuan, "Rorelna sual leh mumal lo tih hi sawifiah ngai loin a chiang. Man chawia test a ngaih laiin, MNF sorkar chuan contract hna a maktaduai tél man a sem thei zel thung," an ti.

Congress party chuan, sorkar quarantine centre-te chu sorkarin a enkawl hneh lo hle nia sawiin, "Ei leh in man a tum thei tawh lo," an ti a; mipui mamawh hrang hrang man khuahkhirh a nih loh avangin MNF sorkar chu rorel ngam loah an puh.

MPCC Communication department chuan, state hrang hrangte'n Covid-19 léng avangin an Health department an thuam chak tih sawiin, "Keini state-ah ve thung chuan nasa taka hlamchhiah a ni thung. Chief Minister-in Health department a theihnghilh daih laiin Tourism department chuan 5-star hotel sak tumin hma an la thung. Hei aia chhuanmang rorel hrilhfiahna ṭha a awm lo," an ti.