Chakhei-Siasi inkar kawng a hunah siam zawh a ni lo

PWD minister Zo­ramthanga, chief minister chuan Assembly session neih mekah Aizawl South-I bialtu MLA C Lalsawivunga zawhna ziaka chhángin, Siaha district-a Chakhei leh Siasi inkar kawng siam hna a huna thawh zawh theih a nih loh thu a tarlang.

Chief Minister tarlan danin, Chakhei leh Siasi inkar kawng siam hna chu KR Construction-in an thawk a, proprietor chu Kamlova Chhangte, Ṭhuampui, Aizawl a ni. Physical achievment 80% leh financial achievment cheng nuai 2,727.69 (54.75%) a ni a; estimate amount cheng nuai 4,982.15 a ni.

Kawng siam hna chu thla 24 chhunga thawh zawh tura ruahman a nih thu tarlangin Zoramthanga chuan, "Covid-19 hripui léng vang te, Assam leh Mizoram ramri buai fo vangte leh fûrpui hun chhung rei lutuk avangtein a hun takah zawh theih a ni lo. Chuvangin, hnathawh hun chhung pawhsei niin, May 2023-ah zo tura beisei a ni," a ti.