Phawngpui National Park-a Silai hmet puaktute man an ni

Phawngpui National Park-a dan loa February 11, 2023-a silai hmet puaktu mi pahnih chu police-te'n an man a, Sangau Police Station-ah thubuai ziah luh a ni a, nimin chhun khan Lawngtlaiah hruai an ni.

Phawngpui National Park-a silai hmet puaktu leh a thurualpuite chu Aizawl mi vek an ni a; PC Lalmuanawma s/o PC Ralzama, Republic Veng, Lalbiakdika s/o Lalthlamuana, Saron Veng, Robert Lalthlamuana s/o Lalmalsawma, Durtlang leh Lalramkima s/o Siamthanga, Saron Veng te an nih thu, Sangaua EFCC department hnuaia thawkte chuan an sawi.

Mi palite hian Phawngpui National Park an tlawh a, Fár Pak báwr vel nia hriatah silai hmet an hmet puak a; silai an hmet puak lai video chu thehdarh a ni. Video darh chu deputy conservator of forest (Chhimtuipui Wildlife Division) Rinmuana leh a thawhpuite'n an chhui zui a, Sangau PS-ah FIR an thehlut bawk.

Mi palite hi an riahna Sangau Tourist Lodge-ah nimin zing khan police-te'n an man a, an silai pawh an man tel a ni. Phalna nei loin Phawngpui National Park-a an luh bakah, an kal lam leh haw lamah gate duty hnena inhriattir loin an tlân tlang niin an sawi.

Mizorama tlang sang ber Phawngpui tlang hi sorkar laipuiin national park-a a puan tawh a ni a, a huam chhunga lût tur leh tlánga láwn tur tan EFCC department-ah phalna lâk hmasak a ngai a, ken luh phal loh eng emaw zat a awm bawk.