Minister-in Hnahthiala khawpuia hna thawh mekte tlawhin a enfiah

Commerce & Industries minister Dr R Lalthangliana chuan February 11, Inrinni khan Hnahthiala Integrated Industrial Promotion Centre (IIPC) building sak tur hmunhma laih ṭan mek a enfiah a; chief minister Zoramthanga kaihhruai sorkarah district tharah hmasawnna a thlen thu a sawi.

Dr R Lalthangliana chuan, Covid-19 hripuiin hun enge maw chen harsatna a thlen chungin hmasawnna tam tak a thleng niin a sawi a, "CM Pu Zoramthanga kaihhruai sorkar tharah district thar a function hnu rei lo têah department hrang hrang building thar changtlung tak tak kan hmu a, ṭha tak tak saka mek a ni hi a ropui a, a lawmawm hle a ni," a ti.

Minister hian Hnahthiala UDPA pisa tur sak mek tlawhin, hna thawktute chu ṭha tak leh rinawm taka thawk turin a chah a; Hnahthial DC pisa thar tur sak mek pawh tlawhin, kumin August thlaah zawh hman a duh thu a hrilh bakah, DC pisaa strong room tur pawh kumin inthlanah hman theiha peih ni se a duh thu thawktute a hrilh.

R Lalthangliana chuan, Hnahthial Convention Centre sakna tur hmun laih mek a tlawh a; a tira estimate-ah garage tur ruahman ni lo mah se, Hnahthial district tan ro tling a nih dawn avangin garage ṭha tak siam turin hna thawktute a hrilh. DRDA pisa thar tur sak mek a tlawh bawk.

Minister hi Hnahthial bawrhsap R Lalremsanga, SP Veenit Kumar leh Hnahthiala sorkar officer dangte'n an ṭawiawm a ni.