Airport himna chungchang CM sawipui

Bureau of Civil Aviation Security (BCAS) director general Zulfiqar Hasan leh a thawhpuite chuan February 11, Inrinni khan chief minister Zoramthanga a pisaah an kâwm a, Lengpui Airport himna leh venhimna chungchang an sawipui.

BCAS Director General chuan, Mizoram chu state rálmuang leh him tak a ni chu vannei a tih thu a sawi rualin, venhimna pawimawhna leh BCAS-in civil flight himna atana zawm tur leh ruahmanna hrang hran an duante Chief Minister a sawipui a ni.

CM Zoramthanga chuan, BCAS hmalakna leh Lengpui Airport atana ruahmanna an thlen ṭhenkhat chu ṭha a tih thu sawiin, "State rálmuang taka awm ni mah ila venhimna thlahthlam a ni lo ang. A ṭul angin thawktu training pek leh security kaihhnawha hmalakna ngai hrang hrangte a kaihhnawih department-te nen inráwnin hmalak zel a ni dawn," a ti.

BCAS hi Ministry of Civil Aviation hnuaia department pakhat a ni a, India rama domestic leh international airport-a civil flight himna turin hma a la ṭhin a ni.

Chief Minister hi chief secretary Dr Renu Sharma, Home secretary H Lalengmawia, DGP Devesh Chandra Srivasta, IGP John Neihlaia, GAD (Aviation Wing) principle consultant Wg.Cdr. J Lalhmingliana leh official dangte'n an ṭawiawm.