MEC puitlin hlauah MNF sorkar puh

Lunglei District Youth Congress Committee (LDYCC) chuan thuchhuah siamin, Lunglei Pukpui rama buaipui mek Mizoram Engineering College (MEC) chu a puitlin MNF sorkarin a hlau nia an hriat thu an tarlang.

LDYCC chuan, MEC building tur hrang hrang sakte chu February 3, 2019 khan Prime Minister-in a hawng tawh tih sawiin, "Zoram mipui, a bikin chhim bial mipui kan lawm hle. MEC hi hmalak mek a nih angin, 2019-20 academic session-a civil engineering department-a ṭan tura ngaih a ni," an ti.

MEC tipuitling turin MNF sorkarin hma a la chhunzawm ṭha lo nia sawiin LDYCC chuan, "Kan sorkar hrawn mek hian hmalak chhunzawm a hnêkin a puitlin an hlauah kan ngai," an ti a; Lungleia MNF MLA-te pawhin MEC tihpuitlin nan hma an la ṭha duh lo nia sawiin, an dem thu leh anmahni thlang tlingtu mipui hmusitnaa an ngaih thu an tarlang.

LDYCC chuan, "Vawin thlenga MEC panna kawng siam ṭhat a la ni lo te, tui leh electric pawh luh a la ni lote hi rilru natthlak kan ti hle a ni," an ti.