Inkhârkhip dan thar a chhuak Biak-in leh zirna-in khâr chhunzawm dawn

Mizoram sorkar chuan inkhàrkhip thawh lina, vawiin aṭanga May 31 thleng awh tura kaihhruaina nimin khan a tichhuak. Biak-in leh zirna-inte khâr chhunzawm zel tur a ni a, dawr hmunpui (shopping mall) erawh chu dawr inkar thlâka hawn chhâwk phal a ni dawn.

Inkharkhip kalpui dan tura State Disaster Management Authority-a SEC chairman Lalnunmawia Chuaungo tarlan danin, zan dar 7 leh zing dar 4 inkarah páwna chhuah khap (curfew) tlat a ni a, Pathianniah Aizawl Municipal Corporation huam chhungah phalna nei lo lirthei chhuah phal a ni lo.

Inkhârkhip chhung hian Mizoram ramri zawng zawng khâr chhunzawm tur a ni a; Bairabi, Vairengte leh Kânhmun kaltlang state ramri-ah erawh chuan mipui ni tin mamawh (essential commodity) bakah, Home department-in phalna a pekte tan bungrua phurh luh theih a ni ang.

State páwn lam lirthei driver leh handyman, bungrua rawn thiar lut ṭhinte chu kalphung pangngai angin khaw dáiah anmahniin eirawng an inbàwl chawp ang a, khaw chhungah mi dang nen inchiahpiah loin an bungrua an hlànthlâk zawh veleh an lêt leh nghal ang. An bungrua unload chhung hian mi dangte aṭanga ft. 6 tala hláah an awm tur a ni.

Biak-in leh zirna-inte khâr zui zel tur a ni a; mipui punkhawmna - inneih lawmna (reception), lungphun, thil lawmna, infiamna lam, politics leh páwl thila punkhawm leh intihhlimna lam reng reng khap chhunzawm a ni.

AMC area chhungah lirthei registration number 'odd-even' anga intlân chhawk zel tur a ni a; odd number (kawpkim lo)-te Thawhṭanni, Nilaini leh Zirtawpniah an tlân thei a, even number (kawpkim)-te Thawhlehni, Ningani leh Inrinniah an tlan thei thung.

AMC leh district headquarters chhung bikah, hmun lûn lai/dàwr kâwna dawr leh shopping complex/mall hawn phal a ni tawh dawn a, a chhunga dawr inṭhenawmte chu ni kár danah hawn chhâwk a ni ang. A ni záwnin dawr pakhat inhawn phal a ni lo a, dawr inṭhenawmte chu ni khatah a ruala hawn phal a ni lo. Inhawn chhâwk hian zirlaibu dawr, mihring leh ran damdawi dawr leh clinic-te a huam lo. Khaw dang zawngah chuan dawr leh sumdawnna hmunte dan pangngaia hawn phal a ni. Dawr dangte chu tlai dar 5-ah khâr vek tur a ni.

Public park, picnic spot, movie theatre, gym, spa, beauty parlour, community hall, bazarpui leh intàwllènna hmun zawng zawng chu khâr chhunzawm tur a ni.

Tuallai leh kawtthlerah thil zawrh phal a ni lo a, mipui mimirin awlsam taka thlai leh chawhmeh an hmuh theih nan task force-te chu an vengah chawhmeh zawrhna ruahman tura tih an ni a; in lama inpek (home delivery) phal a ni bawk.

1.    Screening leh quarantine

    •    Mizoram sorkar phalna nei lo Mizorama luh khap a ni. Phalna neia Mizorama lutte chu entry point-a screening centre-ah enfiah chhunzawm zel a ni ang. Ni 14 chhung emaw, sorkarin ṭul a tih chhung an inkhung hrang tur a ni.

    •    Driver leh handyman, Mizoram páwn aṭanga bungrua laa zinte chu sorkar quarantine facility-ah an khawsa ang a, bungraw lâk hna an thawh chhung chu mi dang nen intlawhpawh loin quarantine aṭangin an thawk ang a, load an lâk hnuhnung ber 

aṭanga ni 14 hnuah inah haw chauh tur.

    •    State páwn lam lirthei driver leh handyman, phai aṭanga bungrua phur lut ṭhinte chu khaw dáiah anmahniin eirawng an inbàwl ang a, khaw chhungah mi dang nen inchiahpiah loin bungrua unload zawh veleh an let nghal ang.

    •    All Mizoram Petroleum Dealers Association leh Mizoram Tanker Drivers Association hnuaia driver leh handyman, Mizoram páwn aṭanga oil phur luttute chu an oil phurh an unload hnuah Vairengte-a an awmna tur ruahmanah an khawsa ang a, chuta ṭang chuan chhungte nena intlawhpawh loin load an la ṭhin ang.

2.    Bungraw lak luh leh thiar

    •    State páwn aṭanga bungraw lak luh theih zingah ni tin mamawhte chu phalna lâk ngai loin lak luh theih a ni. Bungraw dang (non-essential commodity), Home department-in a phalte chu phalna lak ngai loin lak luh theih a ni bawk.

    •    Bungraw la lut tur reng rengin mCOVID-19 mobile application-a mPass hmangin emaw entry point-ah ziakin, declaration an thehlut tur a ni.

    •    Home department phal zinga mi ni lo bungraw dang la lut tur chuan mCOVID-19 mobile application-a mPass hmangin Home phalna an la hmasa tur a ni.

    •    Mizoram chhung bika bungraw phur leh thiarte tan phalna lak a ngai lo.

3.    Dawr leh sumdawnna

    •    Dawr, sumdawnna leh eizawnna kawnga hmalaknate chu Standard Operating Procedure (SOP) for Social Distancing' Attachment-1 tarlan zâwm chunga kalpui tur.

    •    AMC leh district headquarters chhung bikah, hmun lûn lai/ dâwr kâwna dawr leh shopping complex/mall chhunga dawr inṭhenawmte ni kar danah an inhawn chhâwk ang. Ni záwnin dawr pakhat hawn phal a ni lo. Dawr inṭhenawmte ni khatah a ruala hawn phal a ni lo. Hei hian zirlaibu dawr, mihring leh ran damdawi dawr leh clinic-te a huam lo.

    •    Khaw dang zawngah chuan dawr leh sumdawnna hmunte dan pangngaia hawn phal a ni. DC tinten ṭul an tih angin kaihhruaina/khuahkhirhna an siam thei ang.

    •    Veng hrang hrangah LLTF/VLTF-te'n chawhmeh zawrhna tur an ruahman ang.

    •    Chawhmeh, thlai leh theite in lama pek (home delivery) phal a ni.

    •    Public park, picnic spot, movie theatre, gym, spa, beauty parlour, community hall, bazarpui leh intàwllènna hmun zawng zawng khar chhunzawm tur.

    •    Tuallai leh kawtthlera thil zawrh (street vending) khap a ni.

    •    Dawr zawng zawng (damdawi dawr tiam loin) tlai dar 5-ah khâr vek tur.

    •    Mizorama khualzin chám mekte hotel-ah thlen phal a ni a, ei leh in buatsaih phal a ni. Páwn lam mi (hotel-a thleng mikhual ni lo)-te an dawngsawng tur a ni lo.

    •    Restaurant hawn phal a ni lo a, home delivery erawh phal a ni.

4.    Zin veivah chungchang

    •    Mizoram chhung khaw kár kawnga mihring phur lirthei (commercial passenger vehicle) leh town/city bus, taxi, auto-rickshaw leh two wheeler taxi-te tlan phalsak a ni a, registration-a seating capacity tarlan bak phurh phal a ni lo. Lirthei khaltute leh an phurhte'n hmai tumna an vuah vek tur a ni. Passenger-te hman tur hand sanitiser an pai reng 

tur a ni.

    •    Mizoramah bungraw phur motor-te tlan phal a ni.

    •    AMC huam chhungah lirthei registration number odd-even angin an intlân chhâwk ang. Pathianniah chuan eng motor mah tlan phal a ni lo a, hei hian hmun dang aṭanga Aizawl lutte pawh a huam. Intlàn chhâwk leh Pathiannia motor tlan phal loh hian Covid-19 duty sorkar hnathawkte motor, ambulance leh medical/veterinary emergency-a hman motor, sorkar leh private hospital-a thawkte motor, print & electronic media mite lirthei, kohhran hminga motor register, bawlhhlawh paih, bawnghnute phurh/semna leh LLTF duty-te lirthei a huam lo.

    •    Mizoram chhunga zin veivâkte chu Covid-19 vei emaw, symptom nei emaw nen contact history nei an nih loh chuan khung hran an ngai lo.

5.    Mipui khuahkhirhna turte

    •    Hemi hun chhung hian mi 5 aia tam pun khawm khap a ni. Hei hian clause E(3)-a inneih inkhawm leh mitthi vui programme a huam lo.

    •    Ṭul bik thilah lo chuan mahni in leh compound chhuahsan tur a ni lo. Tlai dar 7 leh zing dar 4 inkarah páwn chhuah khap a ni. Hemi atan hian DC-te'n Cr.PC Section 144 tlawhchhanin inkhuahkhirhna thupek an chhuah ang. Hei hian Covid-19 chungchanga duty-te leh DC-in phalna a pekte a huam lo.

6.    Sorkar office kal dan tur

    •    Medical duty, Police, Home Guards, Civil Defence, Fire & Emergency Services, Disaster Management, Civil Aviation, Prison, Excise & Narcotics, municipal service, Forest field work, PHE leh P&E department-a technical staff leh Aizawl páwn lama sorkar office-te a pangngaiin an kal ang.

    •    Sorkar office dang - Secretariat, directorate, district administration leh field office dangte hawn a ni ang a, group A leh B officer-te dan pangngaiin kal vek tur. Group C leh D-te erawh chu a chanve zelin emaw, secretary/head of department/ofifce-te'n inkal chhâwk dan tur an ruahman ang. Constitutional body leh Mizoram sorkar hnuaia board, corporation leh statutory body-te pawh hetiang hian an kal ang.

    •    Office chhungah phalna la hmasa loin páwn lam mi kal phal a ni lo. Kal dawn chuan phone-in emaw an hmuh duhte phalna lak phawt tur.

    •    Ṭul bikah lo chuan meeting neih loh tur. A huhoa inrâwn/sawiho ngai thil a awm chuan a theih chin chinah video conferencing leh online mode dangte hman ṭangkai tur a ni. Meeting turin district danga officer-te Aizawlah koh loh tur.