Sum hmachhuan tur kan nei ve lo, Pathian rinchhanin kan kal dawn - ZPM President

ZPM president Lalliansawta chuan, inthlan awm turah political party ṭhenkhatin sum hmatheh tur an neih theih laiin ZPM chuan sum hman tur duh ang an nei ve thei lo a, Pathian rinchhanin an kal dawn thu a sawi.

Nimina ZPM pisaa lawm luhna inkhawmah thu sawiin Lalliansawta chuan, "Party hrang hrangte'n sorkar tumin hma kan la a, tam takin sum hmatheh tur an neih theih laiin keini chuan sum hman tur duh ang kan nei ve thei lo. Election Commission of India-in MLA inthlana sum hman theih zat a bituk cheng nuai 28 pawh hi keini tan chuan sáng tak a ni," a ti.

Lalliansawta chuan, "Sum hmachhuan tur kan nei ve dawn lo a, Pathian rinchhanin kan kal zawk dawn a, chu chu kohhran hote duh dan leh min beisei dan a ni reng. Sum hmanga inlei tlin tumte chuan eng zat pawh theh chhuak se, keini chuan dik leh fel takin, thawhrimnain hneh kan tum dawn a ni," a ti a; ZPM chu mite aia thawk rim leh taima tur an ni tih sawiin, thawhrimna hmangin ram siamṭhat an duh thu a sawi.

ZPM President chuan, Mizo­ram chu taima leh thawk chhuak tamte hlawhchhamna ramah a chang mek tih sawiin, "Hmasawnna tur sum mimal kuta a luh vak vakna ramah chuan engkim mai hi mipuite'n kan inchuh ruih ruih a, kan rilru a dik famkim tawh loh avangin he ram hian kalphung thar a mamawh. Kan chungah Pathian a lungawi chuan, inthlanpui kan hmachhawn turah kan lamah a ṭang ngei ang," a ti.

MLA leh corporator duhawm tak tak an nei a, an taimâkzia leh hna an thawh ṭhatzia mipuiin an hria nia sawiin Lalliansawta chuan, "In ropui leh ram zau tak tak neihah chuan chhuan tur an awm lo ang, mahse, hnathawhah erawh chhuan tlak leh entawn tlak an ni," a ti a; MLA inthlanpui atan mi ṭha tak tak an la neih ṭeuh thu sawiin, ZPM-in ram enkawl hna an thawh hun mipuiin an nghakhlel tawh hle niin a sawi.

ZPM President chuan, budget session neih mekah an MLA-te an che ṭha hle tih sawiin, "Mipui ái an awh zo hle. An thawhrimna leh an inpeknaah lawmthu ka sawi a, budget sawihona lamah ṭha taka an chêt leh ngei ka ring tlat a ni," a ti bawk.