Sorkar hnathawkte DA pung pe thei rih lo; Hlawh a hma thei anga pek kan tum - CM

Finance enkawltu chief minister Zoramthanga chuan, sorkar hnathawkte dearness allowance (DA) pung pek chu tuna sum dinhmun enin, tih theih a nih rih loh thu a sawi a; sorkar hnathawkte hlawh pek tlai ṭhin chhan chu sorkar laipuiin sum a rawn pek tlai ṭhin vang a nih thu leh, a hma thei ang bera pek ṭhin an tum thu a sawi bawk.

Nimina Assembly Annexe conference hall-a press conference a neihah sorkar hnathawkte'n DA pung pek an phût chu tihhlawhtlin theih a nih leh nih loh zawhna chhángin Chief Minister chuan, "Tuna kan sum dinhmunah chuan pe lui ta ila, kan finance chuan a tuar khawp ang. Tunah mai chuan pe thei dinhmunah kan ding ngang lo a ni e, kan sum dinhmun en chuan," a ti.

Budget tharah sorkar hnathawkte hlawh a hun takah pek theih a nih dawn leh dawn loh Vanglaini palaiin a zawhna chhángin Zoramthanga chuan, "Kan tum teh meuh mai... Kan tih dan pangngaia thla tàwp emaw, thla tìr emawa pek chu kan theihtawpin kan tum ang, Amaherawhchu, kan lo pe thei lo palh a nih pawhin a amount inang reng hi chu a danglam thui teh chiam lo. Theihtawpin kan cash (sum) dinhmun azirin a hma thei ang bera pek chu kan tum ang," a ti a; sorkar laipuiin sum a rawn pêk tlai ṭhin avanga sorkar hnathawkte hlawh pe tlai ṭhin an nih thu a sawi.

Chief Minister chuan, sorkar laipuiin tih dan hrang hrang an rawn nei a, chuvang chuan harsatna thui tak an neih thu a sawi a, "Amaherawhchu, Mizoram sorkar hian hlawh hi pek theih loh kan nei lo ang tluk a ni a. Thla thar ni khatah emaw, thla tawp ni 31-ah emaw kher kher kan pek theih lohna chhan chu, khutah, kan pawisa hmuhna ber share tax te, khang ho rawn kal kha a tlai ta si a, thla chanveahte kan pe a ni," a ti.

Zoramthanga chuan, "Ni 1-a pek a, a thla leh ni 1-ah pek leh emaw, ni 15-a pek a, a thla leh ni 15-a pek pawh kha a amount a inang reng tho a, a danglam lo reng reng a. Ni 10 apianga pek emaw, ni 15 apianga pek emaw, ni 1 apianga pek emaw kha a inang vek a ni," a ti a; hlawh pêk ní chu eng hun pawh ni se, a danglam tam lo niin a sawi.

Sorkar hnathawkte'n an complaint chu, bank-a sum an pûkte thla thar ni 1-a bank lamin an ṭhìn ṭhin chu a nih thu sawiin Zoramthanga chuan, "Hei hi a buaithlak an ti a. Bank ho hnenah kan hrilh a, lo nghâk turin kan hrilh a... Min lo hrethiam rawh u, kan ti a. Kan hrethiam lutuk, computer-a record sa ho khan thla thar a ni a, a rawn ṭhíng a, lo engto duh suh se, an pek tho chuan, hlawh lak huna an pek tho chuan a pawi chuang lo e, an rawn ti," a ti.

Tarlan tawh angin, Federation of Mizoram Government Employees & Workers chuan, a hun taka hlawh lâk leh sorkar laipui rate anga DA lak phûtin nawrh an rêl a; pen/tool down strike leh mass casual leave lak an tum a ni.