2018-a kan tlâk chhan eng dang vak a ni lo, mipuiin min ning tawh a, kan tla a ni - Lalsawta

14th February, 2023

Mizoram Pradesh Congress Committee (MPCC) president Lalsawta chuan, kum 2018 inthlanpuia Congress party an tlâk chhan chu kum 10 an sorkar tawh a, mipuiin an nin tawh vang a nih thu a sawi.

Edenthar Venga Congress party zawm tharte nimina lawm luhna inkhawmah Lalsawta chuan, "Kum 2018 MLA General Election-a kan tlâk chhan kha eng dang vak a ni lo, kum 10 kan sorkar tawh a, mipuiin min ning tawh a, kan tla a ni mai," a ti.

Lalsawta chuan, "Congress party thawh ṭhat thlir loin kan tihsual tlemtê a ri ring zawk a, kan tih ṭhat tam zawk a ri zàwi tlat a. Chu ni lo se sorkarna siam leh thei kan ni reng," a ti a; Pathian remruatnain kum 2018 inthlanah an tla niin a sawi.

MPCC President chuan, "Congress party chuan tláwm takin Rs 1,00,000 kan sem ang, kan ti a, kan sem mai. MNF party-in SEDP Rs 3,00,000 vuak tlûk min tiam a, an pawisa hi a vuai pawh ni mai loin, a lem a ni. A tak a awm lo a, inbumna a ni," a ti a; Mizoram mipui bum tawh lo tur leh dâwt sawi chíng tawh lo turin political party-te a chah.

Mizoramah ram mipuite tan Congress party káwl a êng nia sawiin Lalsawta chuan, "Party mipui kan phûr thar a ṭul. Party mipui chauh ni loin, Mizoram mipui pawh lo phûr a, min ṭawiawm turin ka sáwm che u a ni," a ti a; "Sum hmanga inlei tumte hi kan hlau em? Congress party hian kan hlau lo. Pathian ráwn chungin thluaka sum lut natna hi ûm bo kan tum zawk a ni. Kum 2023 Krismas hi chu Pathian leh mipui zarah Congress party sorkarna hnuaia hman ngei kan tum," a ti bawk.

MPCC vice president Lal Thanzara pawhin thu sawiin, "MNF kalphung kan hria. Beisei tur a awm tawh lohzia hriaa Congress party-ah rinna nghata min rawn zawm hi kan lawm hle. Congress party chuan sum hmachhuan tur kan nei dawn lo a, sum ni loin Pathian kan hmachhuan zawk dawn a ni," a ti a; Pathian leh mipui zarah an sorkar ngei a rin thu a sawi.

Lalsawta hian Edenthar Venga MNF Local Council treasurer Biakmawii leh mi dang 44-te Congress party-ah a lawm lût niin MPCC thuchhuah chuan a tarlang.