Financial Literacy Week hmang ṭan

Reserved Bank of India (RBI) chuan nimin khan Mizoram Rural Bank Head Office auditorium-ah sum enkawl leh hman dan inzirtirna hapta, Financial Literacy Week an hmang ṭan a, Governor Dr Hari Babu Kambhampati-a'n hawngin, RBI-in sum hmanga inbumna laka mipui zirtirna tur a buatsaih 'Be(A)ware' tih booklet a tlangzarh.

Financial Literacy Week hi India ram hmun dang ang bawkin, Mizoram hmun hrang hrangah pawh hawn a ni a, thupui chu 'Good financial behaviour - Your saviour' tih a ni.

Governor chuan, Financial Literacy Week-in sum peipunna leh bank hman ṭangkainaah mipui a puih ngei a beisei thu sawiin, "Bank-te chhawr ṭangkai turin mipui zir­tirna uar zawka kalpui a ngai a, sum peipunna leh loan pûk theihna him leh ṭha an hriat a pawimawh," a ti a; sorkarin mipui tana a duan PMJDY, PMJJBY, PMSBY, APY, PM-KMY, PM-SYM leh PMMY-te chu a hmangtu turte'n ṭang­kai taka an hman theih nan ṭan la lehzual turin bank hotute a chah.

Financial Literacy Week hi RBI bultumin kum 2016-ah India ram pumah hman ṭan a ni a, RBI regional office-te'n hmun hrang hrangah financial literacy camp an buatsaih dawn a ni.

Week hawnna inkhawm zawhah bank hotute leh thuthar thehdarhtute an inkâwm a; thuthar thehdarhtute zawhna chhángin bank hotute chuan, Mizoramah loan pûk leh sum peipunna kaihhnawih mobile application hrang hrang hmang leh bum tâwk an tam thu an sawi.

Bank hotute chuan, loan pûk leh sum kaihhnawih thil dangah bank dàwr a him ber thu an sawi a, "Application him leh him lote hi www.rbi.org.in ah en vek theih a ni a, harsatna nei tan bank lamah pawh thlen theih a ni. Mizo mipuite'n bank dawr kan harsat a, kan harh thar a ngai," an ti.

Sorkar scheme ṭha tak tak puanzar kawngah theihtawp an chhuah thu sawiin bank hotute chuan, "Mipui hian bank hi an hlau emaw tih turin an dàwr hreh ṭhin a, mipuite'n sorkar scheme ṭha tak tak an hman ṭangkai theih loh phah ṭhin," an ti a; mipui tan bank an inhawn reng thu leh harsatna an neih chuan puih an inhuam reng thu an sawi bawk.