Mau chìn leh bamboo link road laihna atana sum hmante sum siamnaah ngai

ZPM Ṭhalai hruaitute chuan February 11, 2023 khan Hmunpui ram Arlei zaua Mizoram sorkarin kut hnathawktute mau a chìntirna hmun leh bamboo link road laihna hmun an tlawh a; an president Dr C Lalrammawia chuan, mau chìnna leh bamboo link road laihna atana sum hmante chu sum siamna mai nia a lan thu a sawi.

ZPM Ṭhalai President chuan, bamboo link road laih chu a tàwi bakah a chhiat thu sawiin, "Sum tam tak sénga bamboo link road laih leh mau ṭiak leina atana sum tam tak luang ral hi pamhmai kan ti a, kum hnih hnuah pawh a taka kut hnathawktute tana hlâwkna leh hlawhtlinna awm lo, tute emaw sum siamna mai niin kan ngai," a ti.

Dr C Lalrammawia chuan, Hmunpui rama mau chînte chu March 13, 2021 khan an tlawh tawh thu sawiin, sum tam tak sénga sorkarin mau a buaipui dan chu fuh lo an tih thu a sawi a, "MNF sorkarin a uanpui em em bamboo link road hi laih chin a tawi a, a chhe em em. Kum 2020-a mau chìnna hmun pawh a la pawh lo," tiin a sawi.

ZPM Ṭhalai tarlan danin, mau ṭiak leina atan Mizoram sorkarin Rs 6,48,16,750 a séng tawh a, mau ṭiak 8,49,425 lei a ni tawh. Mahse, Hmunpui rama mau chìn zingah suma chang tlâk khawpa mau ṭhang ṭha hmuh tur a awm lo.

Mau chìnna atana Horticulture department-in sum a hman tawh zawng zawng chu cheng nuai 1,752 a ni a; National Bamboo Mission hnuaiah kum 2018-2020 inkarah cheng nuai 174.60, North Eastern Council hnuaiah kum 2020-21 chhungin cheng nuai 1,114 leh, SEDP hnuaiah kum 2019-2022 chhungin nuai 463.40 hman tawh a ni.