KHAWTHLIR

Lawngtlai DC thar
Lawngtlai district bawrhsap thar David Lalthantluanga, IAS chuan nimin khan Lawngtlai DC pisa a luah ṭan a, Amol Srivastava, IAS a thlâk. David Lalthantluanga hian kum 1998 khan Mizoram Civil Service a zawm a, kum 25 a thawh hnuah December 19, 2022 khan Indian Administrative Service-ah hlan kai niin, AGMUT, 2014 pek a ni.

Lehkhabu tlangzarh
Dr Christina Lalruatdiki Hangzo lehkhabu ziah, 'The Oral and Maxillofacial Surgical Art' tih chu nimin khan MJA president C Lalrambuatsaiha'n Aizawl Press Club-ah a tlangzarh. Lehkhabu hi Rs 30 man a ni.

Painting Exhibition
S&S Art Gallery, Zarkawtah St Sailo 2nd Solo Painting Exhibition buatsaih a ni a, nimin khan LAD director Rita Lalnunmawii Pachuau-in a hawng. Exhibition-ah hian arcylic 41 leh oil painting-te târ chhuah a ni a; February 18, 2023 thleng awh tur niin, ni tin chawhma 10 aṭanga tlai dar 5 thleng tlawh theih a ni ang.

SIRDPR-ah training
SIRDPR chuan nimin khan an auditorium-ah 'NIRDPR NERC off Campus on Training Needs Assessment' an buatsaih a, Padma Shree dawngtu B Sangkhumi'n a hawng. Training-ah hian SIRDPR, KVK, MKVIB, ITI, FOCUS, ATMA, Zosang Agro leh Angel Business aiawh mi 29 an tel a, February 17, 2023 a awh ang.

Aadhaar sawiho
Aizawl District Aadhaar Monitoring Committee chu nimin khan an chairman Dr Lalhriatzuali Ralte, bawrhsap kaihhruaiin SP conference hall-ah an ṭhukhawm a; mipui tana Aadhaar hman ṭangkaina tur te, harsatna tawhte sutkian dan tur leh inziah luh dan felfai zawk neih dan turte sawiho a ni.

Kuhva rah man
Assam Rifles chuan nimin khan Mélbûk bulah Myanmar aṭanga dan loa kuhva rah lak luh ip 780 an man. Kuhva rah an man hi cheng nuai 351 hù a ni a, dan anga bawhzui turin Champhaia Customs department hnenah an hlan a ni.

Ramhmul damdawi
Mizoram State Medicinal Plants Board Executive Body chu nimin khan an chairman Dr R Lalthangliana, Health minister hoin Secretariat conference hall-ah an ṭhukhawm a, Mizorama ramhmul damdawi lama hmalaknate an sawiho. Medicinal Plants Board hmalakna tur zingah sikul 52-a herbal garden din te, KVK nen ṭangkawpa ramhmul damdawi chi ṭha zawk neih theihna tur nursery dinte a tel.

Fai lawmman lawm
AMC Ward III-in Mizoram Cleanliness Competition 2022-ah Category I-a lawmman pathumna a dawn chu nimin khan White Stone Conference Hall, Ramlun North-ah an lawm a, Sani-tation Awareness Campaign an hmang nghal. Inkhawm hi Ward III councillor C Lalchhandami’n a kaihruai a, UDPA director H Lianzela'n a hmanpui a ni.