Leiba nei tlem ber dawttu kan ni; Delhi-ah sum hai chhuah tur a tam - Chief Minister

Chief minister Zoramthanga, Finance department enkawltu chuan, Mizoram chu India ram state zingah leiba nei tlem ber dawttu a nih thu leh Delhi-ah sum hâi chhuah tur a tam thu a sawi.

Nimina budget a pharh zawhah Chief Minister hian thuthar thehdarhtute a kâwm a, "Sum ba tam lutukte min ti a, India rama sum ba tlem ber chu Sikkim an ni a, a dawttu chu Mizoram kan ni. India rama a ba tlem ber dawttu, a ba tam ber angin min chhuah dawn dawn ṭhin," a ti.

Finance Minister chuan, tun hma angin department-ah sum sem sawm a ni tawh lo tih sawiin, "Renchem taka kal a ngai. Loh theih loa hman tur kan dah phawt a, a bâng tun hma angin department-ah kan pe tawh lo. Tunah chuan awmze neiin kal ang u kan ti," a ti a; Delhi-ah sum a tam a, chumi hai chhuakte tana matching share tur an dah thu a sawi.

Delhi sum hai chhuah a nih theihna atan project siam turin department-te an nawr nasat thu sawiin Zoramthanga chuan, "An buai deuh a nih chuan project siam thiamte pawh ruai mai turin kan ti hial. Delhi-ah sum a tam a, an hman tur a tam lo. Hmalakna turin ram an nei lo a, Delhi sum hi hai chhuah a ngai," a ti.

Chief Minister chuan, Covid-19 vanga sorkar laipui aṭanga sum hmuh loh kum hnih chhungin cheng vbc. 3,000 chuang a awm niin a sawi a, "Keini ang state tê tan chuan a tam tham. Chaw kan ei ṭâwk a ni. Dinhmun a ziaawm ta deuh a, health care-ah vbc. 60 kan dah leh a, kum 10 kan sorkar loh chhung khan cheng khat mah dah a ni lo," a ti.

Supplementary demand chungchang sawiin Zoramthanga chuan, "Kum laklawha lo kal, hriat lâwk lohte a awm ṭhin. Pek belh ngai, lâksak ṭhen ngaite a awm lo thei lo. Kohhran pawhin a tira an budget ang thlap thlapin an ti thei bik lo. Mipui fuihpawrhna atan sawisel an awm takin," a ti a, supplementary demand chu sorkar zawng zawng kalphung niin a sawi.