Laldenga dâwtin sawisel ṭhin mah se a hming a dài tawh dawn lo - K Vanlalauva

MNF treasurer K Vanlalauva chuan, MNF party leh MNF dintu Laldenga chu mi ṭhenkhatin lehkhabuah ziakin dâwt hmangin an sawisel ṭhin niin a sawi a, chuti chung chuan Mizo hnam leh Mizoram a awm chhung chuan Laldenga hming a daih tawh dawn loh thu a sawi.

Nimina Mizo Hnam Rúna inkhawmah K Vanlalauva chuan, "Mi ṭhenkhatte'n MNF party leh Pu Laldenga hi lehkhabua ziak meuhin dâwt hmangin chhuahin sawisel mah se, Pu Laldenga dikzia mite'n an hre chiang tulh tulh a, mite'n a chanchin an chhiar zau tulh tulh a, mipuite'n thu dik chhui zau an châk a, thu dik an hre zel a ni," a ti.

K Vanlalauva chuan, Pathianin Mizote hnenah Laldenga a pe chu vanneihthlak a tih thu sawiin, "Pathianin Mizote hi hnam, sakhua leh ram min pe a, hemi humhalh tlat duhna leh hmangaihna thinlung Pu Laldenga'n Zo fate hnenah a tuh hi a ropui tak zet," a ti a; Laldenga chu India ram mai ni lo, khawvela Mizo hnam pho langtu a nih thu a sawi.