Lunglei Arts Festival buatsaih ṭan

Information & Public Relations department leh South Art Mizoram ṭangkawp chuan nimin khan Art & Culture Auditorium-ah Lunglei Arts Festival, 2023 an buatsaih a, district bawrhsap Ramdinliani'n a hawng.

Festival-ah hian lemziakthiam mi 26-te kutchhuak lemziak 96 pho chhuah a ni a, lemziak ṭhenkhat chu lei theih a ni. Book stall, face painting stall, handicraft stall leh mural painting-te a awm bawk. Festival hi vawiin leh naktukah chhunzawm a ni ang a, naktukah khâr a ni ang.

Lunglei Arts Festival hawnna inkhawm hi IPRO C Lalremruati'n a kaihruai a; bawrhsap Ramdinliani chuan, Festival chu art leh artist-te hmasawnna rahbi thar thlentu a nih ngei a beisei thu sawiin, "Art hi hnam nunphung leh ziaráng vawn ṭhatna pawimawh pakhat a ni a, tourism tihhmasawnna kawngah pawh artist-te kutchhuak tun aia kan hman ṭangkai a ṭul," a ti.