Health care bill bá cheng vbc. 65.90; Thawktute'n registration fee vbc. 3.46 an hmang

Health & family Welfare minister Dr R Lalthangliana chuan, kum 2021-22 leh 2022-23 chhunga Mizoram State Health Care Scheme (MSHCS) hnuaia inziak lutte sum thawh (regsistration fee) tling khawm aṭangin cheng vbc. 3.46 chu thawktute'n an hman thu leh bill bá cheng vbc. 65.90 a awm mek thu Assembly House a hrilh.

ZPM member C Lalsawi-vunga zawhna, 'CM-in Assembly House-a a sawi, Health Care Scheme atana a mamawhtute'n an hman turin Rs 2,00,000 ṭheuh SEDP-ah kan dah,' a tih kha thudik a ni em, tih chu chhángin Health Minister chuan, "Mamawhtute hman turin SEDP aṭangin tun financial year chhung hian cheng vbc. 60 dawn a ni tawh," a ti.

Chief Minister thusawi chu chhungkaw tin hnena Rs 2,00,000 sem lam ni loin, damlote'n Rs 2,00,000 thleng an bill theih tura tihna a nih thu Health Minister chuan a sawi.

MSHCS hnuaia inziak lutte registration fee zat zawhna chhangin Dr R Lalthangliana chuan, "October 1, 2021 - March 31, 2022-ah cheng vbc. 3.31 leh April 1, 2022 - March 31, 2023 inkarah cheng vbc. 4.96 a ni," a ti.

Health Minister sawi danin, registration fee hi thawktute hlawh atan cheng vbc. 3.19 hman a ni a, office expenditure atan cheng nuai 20.47, lirthei hire-na atan Rs 5,00,000 training leh meeting atan cheng Rs 1,87,000 hman a ni. Thawktute'n an hman zawng zawng belhkhawm chu cheng vbc. 3.46 a ni a; Health Care Bill atan cheng vbc. 3.21 hman a ni bawk.

INC member Zodintluanga Ralte zawhna chhangin R Lalthangliana chuan, January 5, 2023 thlengin Mizoram sorkarin health care bill a bat zat chu cheng vbc. 65.90 a nih thu a tarlang a, "January 5 thlenga health care bill thehlut aṭangin bill la thei lo mi 23,462 an awm," a ti a; sorkar aṭanga sum dawn ang zelin pek chhuah ṭhin a nih thu House a hrilh.