Health department hnuaia chhawrte'n hlawh an la lo rei - Zodintluanga; "Hlawh an la thei ṭêp" - Dr Thangtea

Congress Legislature Party (CLP) leader Zodintluanga Ralte chuan, Health department-in Lunglei district-a mi an chhawrte'n hlawh an lâk loh rei tawh thu nimin khan Assembly sesison-ah a sawi chhuak a; Health minister Dr R Lalthangliana chuan, hlawh an pek theih ṭêp tawh thuin a chháng.

Zodintluanga Ralte chuan, Lunglei district-ah staff nurse, health worker, adt. appoinment order pawh awm loa chhawr an nih thu sawiin, "Lâk an nih dawnah interview pawh a awm lo a, a latu ber pawh hriat a ni lo. Chutiang chuan chhawr tawp an ni a, hlawh an la lo rei tawh hle a ni," a ti.

Health Minister chuan, thawktu casual-a an lâk thu sawiin, "SEDP Committee-te'n an buaipui a, clinic awmna khua zel lâk an ni," a ti a, formal (tih dan phung pangngai)-a a kal hleih theih loh thu a sawi.

Hlawh chungchangah Dr R Lalthangliana chuan, "Hlawh an la lo rei deuh a, an la thei ṭêp. An hlawh tur hi Finance department-ah a awm vek tawh," a ti.

MNF member Lalrintluanga Sailo zawhna chhangin Health Minister chuan, Health department-a thawktu indaih lohna sorkarin a hriatpui thu a tarlang a, theihtawp chhuaha hnawh khah tum mek zel a nih thu House a hrilh.

Health Minister tarlan danin, staff nurse 50 contract basis leh tutor 10 regular-a lâk phalna sorkarin a pe tawh a, Mizoram Subordinate Staff Selection Board (MSSSB) kutah advertisment chhuah tura pek a ni tawh. MSSSB kutah a awm tawh avangin lâk hun tur hriat theih a ni rih lo.