Hmunpui khaw rama mau/rua chìnnaah 55,000 chuang a nung ṭha niin sawi

Ex-MNA leh MNF Media department hruaitute chuan nimin khan thuthar thehdarhtute nen Ex-MNA Multi-Purpose Cooperative Society hmalaknaa Hmunpui rama Ex-MNA Bamboo Plantation an tlawh. Bamboo Plantation enkawltute chuan, mau/rua ṭiak 80,000 vel an phun zinga nung ṭha pangngai 55,000 - 60,000 vel an enkawl mek thu an sawi.

Ex-MNA Multipurpose Cooperative Society hruaitute chuan, Hmunpui ramah hian mau chi hnih - D Brandisii leh D Sikkimensis ṭiak 80,000 vel an phun thu an sawi a, "July 2021 aṭangin kan phun a, khami kuma khawkhéng avangin eng emaw zat a thi. Tunah hian puitling mek kûng 55,000-60,000 vel an awm," an ti.

Thuthar thehdarhtute zawhna chhangin Society hotute chuan, an mau/rua enkawlte chu kum 5 chhunga puitling tura ngaih a nih thu mithiamte'n an sawi tih an sawi a, "Bamboo shoot preservation leh charcoal briquette siamna atan khawl bun tura ruahman a ni a, rawtuai ṭín siam leh mau vinegar hmanga damdawi siamte kan tum," an ti a; hmarchhak state hrang hranga mau buaipui dan a hmunah kal chilha an zir chian thu leh Mizoram sorkar hotute pawhin an phûrpui thu an sawi.

Vanglaini palai zawhna chhángin Society hotute chuan, raw ṭiak an phunte buaipui nan sorkarin kum hnih chhung atan cheng nuai 216 a pek thu an sawi a, "A hmun sâm fai, khur laih, a ṭiak chìnna leh hlawhfa rawihna atan cheng nuai 170 vel kan hmang tawh. Raw ṭiak 80,000 vel kan dawn hi a vaiin Rs 60,00,000 man vel a ni," an ti.

Society hotute tarlan danin, Hmunpui rama bamboo plantation hi hectare 170-a zau a ni a, Horticulture department mithiamte'n mau/rua chìn dan tur leh enkawl dan an zirtir ṭhin.
Tun hnai khan Congress party leh ZPM party ṭhalaite'n mau/rua chìnna hmun tak tak thleng loin an en a, thuchhuah an siam chu pawi an tih thu sawiin, "Plantation area chhung luhchilh loin kan chìnna hmun tawntirh lam, a ram hmáwr lam sâm fai lai thla lain an thehdarh a ni," an ti a; tunah hian rua puitling mek kûng 55,000 chuang a awm niin an sawi.

Bamboo plantation tlawhnaah hian Ex-MNA president leh Ex-MNA Multipurpose Cooperative Society chairman C Zama leh hruaitu dangte leh MNF Media & Publicity hruaitute an tel a; journalist ṭhenkhat an tel bawk.