Chief Minister-in Airtel 5G a tlangzarh

Chief minister Zoramthanga chuan nimin khan Chief Minister's Office conference hall-ah Airtel 5G Plus Services a tlangzarh a; mipui tan ṭangkaina tam tak a thlen ngei a rin thu a sawi.

CM Zoramthanga chuan, Mizoram chu tlang rama awm a nih avangin inkalpawhna kawng tihhmasawn a la ngaih zel thu a sawi a, "Kawng pawh a thui avanga ei leh bara hmasawnna pawh duhthusam a chak thei lo a nih laiin, digital age-a kan awm chhawr ṭangkai a, hmun leh hmuna inawm chilh ngei kher loin, internet kaltlanga thil tih theih ṭangkai tak tak a awm ta zel hi malsawmna a ni," a ti.

Chief Minister chuan, internet chak awm ta chu hriselna lam, zirna, agriculture leh service sector-ah ṭangkai taka hman a nih ngei a beisei thu a sawi a; 5G-in Mizoram pum a huam thuai theih nan Bharti Airtel-in hma an lak a beisei thu a sawi bawk.

Information & Communication Technology minister Robert Romawia Royte pawhin thu sawiin, 5G service chuan inrêlbàwlna leh khawtlang nunah eng kawng emaw takin hmasawnna a thlen a beisei thu a sawi a, "Bharti Airtel hian mipui mamawh service ṭha tak an pek zel ka beisei," a ti. Airtel hotute chuan, 5G service chu a tahtawlin kalpui a nih tur thu an sawi.

Nimin aṭang khan Zarkawt, Tuikual North, Bawngkawn, New Capital, Durtlang, Zemabawk, Luangmual leh hmun dang ṭhenkhatah 5G hman theihna device (phone, tablet)-ah chuan sum chawi belh ngai loin 5G network a zawm theih a ni.