V-Day pualin mi 1,093-in thisen an peV-Day pualin mi 1,093-in thisen an pe

Association for Voluntary Blood Donation (AVBD), Mizoram State AIDS Control Society (MSACS) leh blood bank-te ṭangho chuan nimin khan Mizoram hmun hrang hrangah Valentine's Day pualin thisen pek rûnpui an huaihawt a, thisen unit 1,093 pek a ni.

Valentine's Day Blood Donation Camp hi blood bank 11-ah huaihawt a ni a; huaihawtna pui ber, Aizawla Chanmari YMA Hall-ah chuan AVBD, MSACS leh Civil Hospital Blood Bank-te'n huaihawtin, Music Domain Mizoram-in an pui a, zaithiam ṭhahnem tak an zai bakah, thisen pek leh HIV/AIDS chungchangah inzirtirna hun hman a ni. Chanmari YMA Hall-ah hian mipa 166 leh hmeichhia 66-te'n thisen unit 232 an pe.

Aizawla thisen pek rûnpui hi Health minister Dr R Lalthangliana'n a tlawh a; ṭhalaite'n an ngaihhlut em em Valentine's Day chu mi dang tana malsawmna nihna remchang atan hmang a, thisen pek rûnpui huaihawt a ni chu V-Day hman dan ṭha ber pawl nia a hriat thu a sawi a, ṭhalaite chu thisen pek uar zel turin a sáwm. Minister hian thisen pek rûnpui huaihawtnaa senso phuhrûk nan AVBD hnenah Rs 10,000 a pe a ni.

AVBD president C Lalnunnema chuan, V-Day puala thisen pek rûnpui huaihawta thisen petute zawng zawng chungah an lawm thu a sawi a; PWD-in kawngpui an siam mek pawh an dil angin nimin bikah chawlhsan rih a nih thu sawiin, sorkar leh PWD hotute chungah an lawm thu te, hall hmantirtu Chanmari Branch YMA, blood pressure endiknaa puitu MFM School of Nursing leh kawng hrang hranga puitute chungah an lawm tak zet thu a sawi bawk.

Valentine's Day-a thisen pek hi kum 2010 khan Mizoramah kalpui ṭan a ni a, kum 2010 aṭanga kumin thlengin thisen unit 9,772 pek a ni tawh a ni.