Mizoram sorkarin OMB hmangin Cheng vbc. 100 a pûk leh dawn

Mizoram sorkar chuan open market borrowing (OMB) hmangin loan cheng vbc. 100 a pûk leh dawn a, a hmaa a lo pûk tawh nen sorkar kum kal mek 2022-23 chhungin cheng vbc. 1,140 a pûkna tur a ni.

Finance department hotute sawi danin, sorkar kum kal mek 2022-23 chhungin Mizoram sorkar chuan Reserve Bank of India (RBI) OMB hmanga sum pûk a phalsak zat chu a tìrah cheng vbc. 990 a ni a, a hnuah thla thum January-March, 2023 atan cheng vbc. 320 pûk a phalsak leh a ni.

Vanglaini thu dawn danin, Mizoram sorkarin OMB hmanga sum a pûkna tura tih tur ṭulte chu RBI-in a buaipui a; RBI chuan OMB hmanga Mizoram sorkarin sum pûk tur a zawn thu February 10, 2023 khan a tarlang.

OMB hmanga sum pûk a nih theih nan RBI-in state sorkar tan sum pûktir thei tur a zawng a, financial institution-te'n an chháng ṭhin. Mizoram sorkar sum pûk tur chháng duh tan RBI chuan nimin, February 14 thleng chhanna hun a hawng.

OMB hmanga sum pûk chu kum khatah a pung vawi hnih rulh tur a ni a, kum 10 velah sum pûk zawng zawng rulh a ngai a; a punna chu 7-8% vel a ni.

Hriat theih chinah sorkar kum kal mek chhungin Mizoram sorkar chuan OMB hmangin ṭum riat loan a pûk tawh a, a pûk tawh zat belh khawm chu cheng vbc. 940 a tling.