UCC duh lohna resolution Assembly House-in a pawm

Nimina Assembly session-ah Home minister Lalchamliana official resolution put luh, Uniform Civil Code (UCC) dodâlna chu sawiho a nih hnuah lungrual taka pawm a ni.

MNF Legislature Party-in an rèl angin Home Minister hian UCC dodalna 'That this House unanimously resolves to oppose any step takin or proposed to be takin for enactment of Uniform Civi Code in India' tih chu a pu lût a ni. Resolution hi member zingah pawm duh lo an awm lo.

Lalchamliana chuan, hnam tinin tih dan phung, kalphung, inṭhen leh inneih, thurochhiah, ram neih dan, customary law, adt. an neih hrang tih sawiin, "Hengte hi dah bo emaw, paih bo vek a, inang tlanga hman tur siam chu UCC thil tum a ni a, hnam leh sakhua thliar loa hrût rual vek a tum a ni," a ti.

Home Minister chuan, UCC chu India ram pumah hman tur a nih chuan Mizo hnam leh sakhaw himna a nghawng ngei dawn tih sawiin, "Kan hnam tih dan phung kan vawn nun reng hi a nghawng ngei dawn a ni," a ti a; hnam tênau leh sakhaw tlém tan a pawi dawn avangin a resolution pawmpui turin House member-te a sáwm a ni.