Mizorama district headquarters tinah solid waste management centre din tum

UDPA department enkawltu deputy chief minister Tawnluia chuan ZPM member VL Zaithanzama zawhna chhangin, Mizorama district headquarters tinah solid waste management centre (SWMC) din tum a nih thu Assembly House a hrilh.

VL Zaithanzama chuan, SWMC chu National Green Tribunal-in a ngaih pawimawh thu sawiin, "SWMC dinna tawhna district Aizawl leh Kolasib bak hmun dangah din tumna a awm em? Tuiriala SWMC hi a mumal lo a, sâwngbàwl mumal loa nawr liam mai maite a ni ṭhin. Hmun dangah din belh tumna a awm em?" tiin a zawh belh.

Deputy Chief Minister chuan, district khawpui tinah SWMC din tum a nih thu sawiin, "Lungleiah sorkar hmasa aṭanga ṭan hmalakna a awm mek. Champhai, Saitual, Hnahthial leh Khawzawlah pawh bul ṭan a ni tawh. District headquarters dang atan pawh concept paper peih tawh a ni a, NESID-ah telh a ni dawn," a ti.

Hualngohmunah special asistance aṭanga sum hmuh cheng vbc. 16 hmangin SWMC tur buaipui mek a nih thu sawiin Tawnluia chuan, "Sum a len tham deuh avangin PWD kutah hlan a ni a, tender-te chhuahin contractor-te pawhin an chháng tawh," a ti a; Aizawl west leh Sihphir lamahte pawh SWMC siam tum a nih thu a sawi bawk.