Chakai farm-ah thlai an chíng - ZPM ṭhalai

ZPM Ṭhalai chuan thuchhuah siamin, February 13, Thawhṭanni khan an president Dr C Lalrammawia hoin Kolasib Dumluia SEDP pilot project Chakai Farm an tlawh thu an tarlang a, "Chakai awmna tura ruahmanah thlai chìn a ni," an ti.

ZPM ṭhalaite tarlan danin, cheng nuai 57 chuang senna chakai farm, chakai 48,000 vel awm theihna tura ruahmanah chakai hmuh tur a awm lo a; chakai awmna tura ruahmanah dhania, behlâwi leh broccoli-te chìn a ni.

Chakai awmna tura ruahman plot pathum zinga plot pahnihah tui a awm lo a, plot dang pakhatah chuan thlai chi hrang hrang chìn a ni. MNF sorkâr hmasak laia Falkawna Referral Hospital tur, ar vulhna atana hman nen thil thuhmuna ngaih theih a nih thu an tarlang.

Chakai farm kalpui dan chu pawi an tih thu tarlangin ZPM ṭhalaite chuan, "SEDP trade-ah chakai farm chu mipui thlan theih tura telh a nih tawh laia a sûlsutu chakai farm-ah chakai pakhat mah hmuh tur awm loa hetianga a zuih ral leh si hi a pawi kan ti. MNF sorkarah hian kut hnathawktute khai chhuah tumna tak tak a awm lo em ni, tih hi kan zawhna a ni," an ti.