Champhai dist. tana hmalakna tur sawiho

Champhai bawrhsap James Lalrinchhana leh Champhai District All NGO Committee hruaitute chuan nimin khan an district tana hmalakna tur pawimawhte an sawiho.

James Lalrinchhana chuan, sorkar hnathawk leh NGO-te chu mipui rawngbawl tur leh an hmakhua ngaia theihtawp chhuah tur an nih thu sawiin, "Mipui aiawh nihna inhre chungin, ram leh hnam tana ṭan rual thiam a pawimawh. Dan hnuaiah theihtawp chhuaha hmalakho a, infinchhuah tlân zel a ṭul," a ti.

Myanmar ram buai avanga an la inpeih loh lai pawhin ramri kaltlanga sumdawnna dan ang taka kalpui a nih theih nan sorkarin theihtawp a chhuah mek tih sawiin Bawrhsap chuan, "Hmunhma cheibâwl mek a ni," a ti a; Champhai district tana pawimawh hrang hranga hmalaknate a tarlang.

Ṭhutukhawmah hian Keilungliah tuikhuah chu fai leh thianghlim taka siam turin a châwmtu hnârte uluk lehzuala enkawl a, hnâwm paih lo tura inzirtir ṭul an ti a; Champhai khawpui châwmtu Khawchhak Tuipui hnár humhalh leh tuihna tlém zel vên kawnga hmalak ṭulte sawihoin, uluk zawka mithiamte ráwn chungin zirchian ni se, an ti.

Road Safety Committee, ruihhlo do kawnga hmalakna te, consumer forum tihchak te, traffic management leh Swadhar Greh chungchanga hmalaknate sawiho a ni bawk.