Electoral roll aṭanga Bru paih tawh dan MNYF-in an zawt

Mizo National Youth Front (MNYF) hruaitute chu nimin khan Election office-ah an kal a, Tripura-a khawsa Bru-te Mizoram electoral roll aṭanga paih an nih tawh dan an zawt fiah.

MNF ṭhalai chuan thuchhuah siamin, January 16, 2020 khan chief minister Zoramthanga kaihhruai MNF sorkar leh tlawmngai pawlte ṭanrualna avangin Tripura-a khawsa Bru-te chu Union Home minister Amit Shah kaihhruaina hnuaiah mi 30,000 chuang Tripura-a awm nghet turin New Delhi-ah inremna thuthlung ziahpui an ni tawh tih an tarlang.

Mizoram Chief Minister bakah, khatih laia Tripura chief minister Biplab Kumar Deb leh Bru pawl hrang hrang aiawhte'n inremna an siam a, November 30, 2019 hnu lama Tripura relief camp-a Bru la awm mekte chu an duhthlannain Tripura-a an awm hlen an lo remti tawh tih tarlangin MNYF chuan, "He hmalakna kal zelah hian Tripura-a inbéngbel tawh, Mizoram electoral roll-a hming la chuang Bru voter 11,658 chu ECI kaihhruaina hnuaiah Mizoram electoral roll aṭanga paih tura hmalak a ni," an ti.

MNYF tarlan danin, Bru mi 4,339 chu Mizoram electoral roll aṭanga paih an ni tawh a, paih hmabak voter 7,319 an la awm a ni.