Tangkhang haw turte zawm tur tichhuak

Disaster Management & Rehabilitation department chuan, Mizoram mi leh sâ India ram hmun danga tangkhangte Mizorama an lo haw dan tur leh lo dawnsawn dan turah kaihhruaina, Revised Standard Operating Procedure (SOP) for Return of Permanent Residents of Mizoram Stranded Outside the State due to Covid-19 Lockdown a tichhuak. SOP hi a ṭul dan azira siamṭhat theih a ni.

I.    Mizoram thlen dan tur

    1.    Mizorama khawsa nghet, India ram hmun danga tangkhangte chu Mizoram sorkar phalna la hmasa lo leh SOP zâwm loa Mizorama haw phal a ni lo.

    2.    Mizorama haw duhte chuan Mizo welfare/association hnai berah an inhriattir tur a ni. Mizo welfare/association-te'n hming fel tak siamin, Task Group on Migrant Workers & Stranded Travellers (TGMWST)-ah an thehlut ang.

    3.    Mizoram pan dan tur (mode of transportation) ruahhman a ni ang a, rél (shramik special train)-a haw remchang turte tan chuan an awmna aṭanga rél an man theihna station hnai ber ngaihtuah­sak (identify) a ni ang a; Railways hotute ruahman dan azirin Bairabi/ Silchar/ Guwahati thlengin rél a kal ang. An awmna hmun aṭanga rel an manna tur hmun an thlen dan tur chu mahnia ruahman a ngai.

    4.    Mizorama lo haw turte chu state danga haw turte nen an inchuan pawlh loh nan 'Shramik special train' boogie hranah chuantir an nih theih nan hmalak a ni ang.

    5.    Tangkhangte hawna tur district-a DC (Bairabi station-a chhuk tan) leh DRC (Guwahati leh Silchar-a chhuk tan) ten 'Movement Plan' felfai tak an siam ang. Chu chu tangkhangte khua/veng bialtu district-a DC leh Task Group on Quarantine Facilities an hriattir tur a ni.

    6.    Rél ticket, bus chuan man leh kawng laka ei leh in mante chu mahnia intum a ngai a, sum lama harsatna nei tan an awmna zone atana ruat officer-in-charge hriattir tur a ni a, Mizoram sorkarin ruahmanna a siam ang. Mizoram chhunga an kal velna tur chu state sorkarin a tum ang.

    7.    Motor-a haw duh tan Mizoram House hnai bera sorkar hotute hnenah inhriat­tir tur a ni a, anni'n an hawna tur DC-te ráwn chungin haw dan tur an ruahman ang.

    8.    Mizoram House awm lohna hmuna tangkhang, motor-a haw duhte chuan an nihna leh dinhmun, an lo haw hun tur kimchang, an tangkhangna state bik tana officer-in-charge an hrilh lâwk ang.

    9.    Mizorama hawte chu entry point (Vairengte/Bairabi) an thlen hunah an hriselna endik vek tur a ni a, sorkar thupek angin ni 14 chhung tal khung hran tur an ni.

II.    Mizoram thlen hnu lam

    1.    DC-te'n quarantine facility hrang hrang­a an dah dan tur an ruahman ang a, a hma thei ang berin haw turte hnenah an hriattir ang.

    2.    Tangkhangte haw dan tur leh khung hranna tura ruahmanna zawng zawng chu DC-te'n entry point-a official duty-te an hriattir zel tur a ni.

    3.    Lo hawte chu ramria entry point-ah uluk taka endik vek tur a ni a, Home department phalna nei lote chu Mizoram chhungah luh phal a ni lo.

    4.    Screening paltlang tawhte chu an awmna tur quarantine facility an pan nghal tur a ni a, chawlh khawmuan phal a ni lo. Social distancing, faina leh thiang­hlimna kawnga inkaihhruina siamte chu an zâwm ṭha tur a ni.

    5.    DC-te'n dawnsawnna tur hmun bik an buatsaih ang a, ruahmanna an siam dan tur chu Task Group on Commodities & Transport, officer-in-charge, Home department, etc. hriattir tur a ni. Hmun dang pan leh turte tana chawlh lailâwk­na (transit) hmun tur pawh DC-in an siam ang.

    6.    Lo hawte chu quarantine centre an thlen veleh Rapid Antibody Test (RAT) hmanga endik tur a ni.

    7.    Home quarantine thei leh duhte'n an hawna tur district-a DC hnenah an dil lâwk tur a ni a, online-a dil theih a ni. Home quarantine phalsak an nih chuan sorkarin kaihhruaina a zamte an zâwm ngei tur a ni a; ziakin intiamkamna an nei tur a ni.

    8.    Tangkhang hawte zinga RAT negative (non-reactive)-te'n an sum sénga hotel ruat bika inkhung hran an duh chuan remtihsak a ni ang.

    9.    Tangkhang haw turte'n an duhthu ngeia an haw tur thu leh hawna tura zawm ngai sorkarin a zamte an zawm ngei tur a ni. Intiamkamna ziakin an dah tur a ni a, kumtling lo an nih chuan nu/pa/enkawltute'n an ziak ang.

    10.    Tangkhang lo haw zawng zawngte chu mcovid-19 leh Aarogya Setu mobile application-ah in-register vek tur a ni.