Mizorama grape wine siam chhuahah Mizoram sorkarin VAT pe turin a ti

Champhai Grape Growers Society (CGGS) hruaitute chuan, grape sàwrna winery an din tirh aṭangin sorkar aṭangin harsatna tam tak an tâwk tawh a, tunah pawh sorkarin value added tax (VAT) pe turin a tih leh mek thu leh, chu chu harsatna an tawh tharlám ber a nih thu an sawi.

Tlangsama CGGS Winery hi February 10, 2023 khan Aizawla MJA member-te'n an tlawh a; winery hotute nen an inkawmnaah winery hotute chuan, "Harsatna kan paltlang nasa a, sorkar aṭang pawhin harsatna kan tâwk nasa; tun thlengin harsatna kan la tâwk reng. Chhiah kan pek mek bâka value added tax (VAT) pe tura tih kan ni leh phei hi chu kan tan chuan rit tak a ni. VAT la lo turin sorkar kan dil dawn a, kan buaipui mek," an ti.

Winery hotute sawi danin, tuna sorkarin grape wine aṭanga chhiah a lak mek chu báwm (case) khatah Rs 90 a ni a; sorkarin VAT lâk a tum zat chu báwm khatah Rs 375 a ni.

Champhai Winery-a grape wine siam chhuah, Champwine hralh chhuak turin harsatna an tâwk mek tih sawiin Winery hotute chuan, "Challan a ngai a, chutah chuan chhiah pekna receipt a awm a ngai a, challan tel loin pek chhuah theih a ni lo. Mahse, challan chu Excise & Narcotics department (END)-in an la pe chhuak thei bawk si lo," an ti.

Winery hotute chuan, "Champwine kan siamte hi Excise hoin an rawn chhiar a, a zat an chhinchhiah vek a, 'A zat hi a danglam vaih chuan in tan a pawi khawp ang,' an ti a. Chuvangin kan khawih danglam ngam lo," an ti a; grape wine chu food item a nih avangin free sale mai tur ni àwm tak a nih laiin, Mizoram sorkarin a khuahkhirh tlat chu an tan a buaithlak hle tih an sawi.

Zawhna chhangin Winery hotute chuan, an grape wine siamte Baptist Church of Mizoram-in sakramen atana an hman tur chu a bika siam a nih thu leh nikum kum tàwp lamah báwm 100 vel an la a, kuminah an la lâk loh thu an sawi a, "Kohhranin wine atana an hman chu engmah pawlh loh, pure tak tak kan pe a, a hranpaa um a ngai. Alcohol zatah an buai lo a, engmah telh loh an duh a ni mai," an ti.

Synod Inkhawmpuiin sakramen atana Mizorama thar grape aṭanga siam wine hman chungchang zir chian a rel chungchangah Winery hotute chuan, Synod lamin an winery an la tlawh lo a, wine an siam dante an la zawhfiah loh thu an sawi bawk.

Winery hian Champwine an siam chu úm (bottle) chi hnihah an thun a; úm puitling (mililitre 750) chu Rs 300 man a ni a, a chanve úm (ml. 375) chu Rs 150 man a ni. Wine-a alcohol awm zat chu 10% aia tam lo turin sorkarin a ti niin an sawi. Tunah hian Champwine úma thun sa báwm 200 vel leh úma la thun loh litre nuai khat chuang an kawl mek a ni.

Champhai Winery hian Champhai leh a chhehvela grape chingtute aṭangin grape an lei ṭhin a; Horticulture department chhinchhiah danin, Champhai leh a chhehvel khuate chuan nikum 2022 chhung khan grape quintal 1,144.99 an thar a, Rs 68,69,899.80 an hmu a ni.

Hetih lai hian, Hnahlan khuaa grape chíngtute'n nikum khan qtl. 1,500 an thar aṭangin Rs 90,00,000 an hmu thung.