Tourism hnathawhah NECS an inrawlh - ZPM; Insawifiah turin Robert Romawia an phût

ZPM party hruaitute chuan, 'Development of immediately required infrastructure for tourist development at Reiek tlang,' tihah dik lo taka thil tih a awm nia an hriat thu leh, Tourism minister Robert Romawia Royte fapa enkawl NECS chu thûk takin an inrawlha an hriat thu an tarlang a; insawifiah turin Tourism Minister an phût.

ZPM party hruaitute hian nimin khan Aizawl Press Club-ah thuthar thehdarhtute an kâwm a; Tourism department hnuaia Reiek tlanga hnathawhte chu February 13, 2023 khan a hmuna an enfiahnaa an hmuh dante an sawi a ni.

ZPM PAC member TBC Lalvenchhunga sawi danin, Reiek tlanga tourist development hna thawhna atana sum ruahman chu cheng vbc. 560 a ni a, DoNER aṭanga hmuh a ni. Hna thawk tura thlan chu DJ Consultancy Services, Peter Street, Sikulpuikawn niin, restricted tender hmanga pek a ni.

July 30, 2020-ah hna ṭan a ni a, thla 18 chhung (December 2021 ral hma)-a zawh tur a nih laiin, an zo hman lo a, thla 13 chhung (January 2023 thleng) hun pek belh an nih hnuah pawh tun thlengin an la zo lo. RTI Act hmanga zawhna chhannaa a lan danin, December 7, 2022 khan hna thawh tur aṭanga 87% zawh a ni tawh a, sum nuai 356.485 pek chhuah a ni tawh.

TBC Lalvenchhunga chuan, contract agree-ment-ah chuan, hna chu hum tiam chhunga zawh a nih loh chuan hun tiam pelh hnu ni khat aṭanga ni 30 inkarah ni tin Rs 2,000 chawi tur a nih thu leh, ni 30 aṭanga ni 90 inkarah ni tin Rs 7,500 chawi tur a nih thu a sawi.

Hna chu hlawm (works component) 12-ah ṭhen a nih thu sawiin TBC Lalvenchhunga chuan, "Sanction amount leh hnathawhte a inmil lo hleah kan ngai. Hna ṭhenkhat chu a taka min kawhhmuh tur an nei lo. An hnathawh zawh tawh nia sawi leh department-in sum an pek chhuah hi a inphu lo hle a ni," a ti.

TBC Lalvenchhunga chuan, hna chu DJ Consultancy Services hminga a kal laiin, a hmuna an enfiahnaah hna thawktute leh viltute chu NECS hnuaia thawk vek an nih thu sawiin, "Hna an lo thawh mek architecture & structure drawing pawh NECS siam a ni. Hna hi DJ Consultancy Services hming ni mah se, a tak takah chuan Tourism Minister fapa consultancy firm NECS thawh ngei a ni tih a chiang hle. A phênah Minister hi a biru ngeiah kan ngai," a ti a; Robert Romawia chan department hnuaia hna dangte pawh restricted tender hmanga pek a nih thu a sawi.

ZPM party chuan Tourism minister Robert Romawia chu minister ni tura a thutiam bawhchhiaah puhin, insawifiah turin an phût a, a insawifiah thei lo a nih chuan báng ngam turin an phût. DCMA minister R Lalzirliana pawh NECS hnena hna an inpek dan sawifiah turin an phût tel bawk.