DRDA-a thawk court-a kalte'n thiam loh an chan chuan an thlawn dawn

Rural Development minister Lalruatkima chuan, DRDA-a thawk, kum 2008 hnu lama lak mi 25-te Court-ah an kal mek a, thiam loh an chang a nih chuan an thlawn nghal dawn thu nimin khan House a hrilh a sawi.

INC member C Ngunlianchunga'n DRDA-a thawk, kum 2008 hma lama lakte state sorkarin a lak (absorb) laiin, kum 2008 hnu lama lakte absorb an ni ve lo tih a sawi a, absorb ve theih an nih leh nih loh zawhna chhangin RD Minister chuan, "Absorb-te mi 87 an ni. Kum 2008 hnu lama appointment pek mi 25 an awm," a ti.

DRDA chu sorkar laipuiin titawp turin thu a rawn pek angin Mizoram sorkarin a tihtawp thu a sawi a, "DRDO ni tawh rawh se, a ti a, a thawkte pawh kan kutah an awm ta a ni. Kum 2008 hnu lama lak mi 25-te hi court-ah dah ngheh phûtin an kal mek a, thiam an chang lo a nih chuan an thlawn nghal dawn tihna a ni. Dah ngheh tumna emaw, tum lohna emaw a awm lo," a ti. Court-in thiam a chantir thu C Ngunlianchunga'n a sawi chungchangah Lalruatkima chuan, sorkarin court thutlukna a khin lêt avangin thubuai chinfel a la nih loh thu a sawi.