Lawngtlai DC leh MJA inkâwm

Lawngtlai district bawrhsap thar David Lalthantluanga chuan nimin khan a pisaah Mizoram Journalists' Association (MJA), Lawngtlai district member-te a kâwm a, an district hmasawnna atana hmalakna turte a sawipui.

David Lalthantluanga chuan, chanchinbumite chu khawtlang leh ram hmasawnna tura mi pawimawh leh sorkar khalh ngiltu an nih thu sawiin, "District administration leh MJA-te thawhhona ṭha a awm chuan district-in nasa takin hma a sawn dawn a ni," a ti a; a ṭulna apiangah finchhuaha thuràwn pe turin a chah.

Lawngtlai MJA president Lalngheta Ralte chuan, Bawrhsap hnenah hian Lawngtlai District MJA patron a ni tih hriattirna lehkha a pe a; District MJA Welfare & Pension Rules bu leh MJA muffler a hlân bawk.

MJA hruaitute chuan, Lawngtlai district hmasawnna turin englai pawhin sorkar an thawhpui theih reng thu an sawi a; MJA-te hnathawh dan leh hmalakna tlangpui an hrilh nghal a ni.