Venus Bamboo-ah tih fuh loh kan nei - CM Zorama

Chief minister Zoramthanga chuan, Venus Bamboo Product chungchangah Mizoram sorkar leh mimalte'n tih fuh chiah loh an neih thu Assembly House a hrilh.

Nimina Assem­bly session-ah Lalchhuan-thanga zawhna kal zelah Dr Vanlalthlana'n Venus Bamboo chungchang a zâwt a; Commerce & Industries minister Dr R Lalthangliana chuan, thil buaithlak tak tak (critical)-te a awm avangin kimchang deuh taka chhàn châk mah se, "Ka chhâng lo mai ang e," tiin, a pisa lama lêng turin a zawttu a sáwm a ni.

Mizoram Venus Bamboo Products chung-changah hian House leader Zoramthanga chuan, a bul ṭantu an nih thu sawiin, beiseina sang tak nen kal mah se, Mizoram sorkar leh mimalte'n thil tih fuh chiah loh an neih thu a sawi a, "Bamboo industry kan han siam a, private pawhin an siam sup sup a, beiseina sang tak an nei. Mahse, a raw material lo kal tura kha rua leh mau tam viau e ti loin, rin aiin a lut thei lo a, a ṭáwl ṭeuh mai," a ti.

Zoramthanga chuan, Venus Bamboo-a raw meterial supply tih tak taka tih dawn chuan a kal tam thei lo tih sawiin, "Link road awm loh vang te, mau a tê chi a lo ni a, a lian lâkna turin kawr kila mi lak chhuah khan a man a to lutuk si a, chuvangin, a ding ta ṭhup mai a ni," a ti a; Venus Bamboo kal zel tur pawh kháwl nei hle mah se, raw material a tam tâwk theih loh avangin harsatna a awm ta niin a sawi.