Sum hmatheha mipuia inzawrh sim turin political party ngen

Rorelna Dik Duhtute chuan nimin khan Hotel Regecy-ah Rorelna Dik khuhhawnna hun an hmang a; tangka sum hmatheha mipui hnena inzawrh sim turin political party-te an ngen.

Khuhhawnna hun kaihruaitu Lalrammawia chuan, tuna Mizoram dinhmunah Pathian ngainat loh tam tak a awma an hriat thu leh, chu'ngte chu a bo theih nan danglam a hun lutuk tawh avanga pên chhuak an nih thu a sawi.

Rorelna Dik Duhtute hian political party tinte chu tangka sum hmatheha mipui hnena inzawrh sim tur leh party sorkar ni lo, mipui sorkar siam ṭheuh turin an ngen a; political party ruih chilh lo tur leh political party aṭangin chhungkua leh mimala tangka leh hlâwkna bil dawn tumna nei lo turin mipui an ngen.

Roreltute an kal sualnaah siamṭha tura huaisen zawka ke pên ngam tur leh mipuiin dang-lamna tura hma an laknaah huaisen taka hma la ve turin kohhran leh pawl hruaitute an ngen bawk.

Lalrammawia chuan, Rorelna Dik Duhtute chu pawl anga ding an nih loh thu a sawi a, "Rorelna dik awmtira siam turin thuneihna kan nei lo. Kan tih theih tâwk chu rorelna dik a awm theihna tura ṭawngṭai te, mi hnena theih ang tâwka ngenna siama sawi leh thawh a ni," a ti.

Inlungrualna pakhat an neih thu sawiin Lalrammawia chuan, "Kan ram rorelnaah Pathianin lalna a chan a, Pathian ram a thlen theihna atana hmalakho a, hlemhlêtna, hleihneihna, dan bawhchhiat leh pawisak lohna, milem biakna a bo duhtute kan ni," a ti a; chutiang duha beisei leh hmalak duhtute chu an zinga tel ve turin an sáwm a ni.

Lalrammawia chuan, political party àwn bik an neih loh thu te, mipui thinlungah Pathian thu anga thil dik leh ṭha a lal ber theihna tura hmalak an tum thu te, political party hruaitute'n dik leh felfai taka hna an thawh theihna tura hmalak te, an hmalakna hmasa atan youtube channel 'Rorelna Dik' tih an siam thute a sawi bawk.