KHAWTHLIR

NAAC Aizawlah
India rama university leh college dinhmun endiktu National Assessment and Accreditation Council (NAAC) Peer Team chu nimin khan Aizawl West College endik turin an rawn thleng a, nimin leh vawiinah an endik ang.

VC house 150 sa
LAD minister K Lalrinliana chuan MNF member Ramthanmawia, C Lalmuanpuia leh Zothantluanga te zawhna inṭâwm chhángin, RGSA (Rashtriya Gram Swaraj Abhiyan) hnuaiah VC 150 tan VC house sak a nih tawh thu te, VC 243 hnenah computer pek a nih tawh thu leh, VC 20 hnenah common service centre pek a nih tawh thute Assembly House a hrilh.

Leitlangpui Rahbi
Lunglei district-a sumdawnna kaih-hnawih ruahmanna neih ṭhata intihsiakna, Leitlangpui Rahbi 2021-2022 Micro Start Up Capital Competition-a ti ṭhate hnenah nimin khan lawmman sem a ni a, Lunglei HPC vice chairman Lawmawma Tochhawng, MLA-in online hmangin a hmanpui. Kutkawih eizawnna lama kal mi 47 hnenah winner certificate hlan a ni a, ṭanpuina an dawn tur Rs 50,000 - 2,00,000 aṭanga 75% pek nghal a ni bawk.

Ramvah khap
Serchhip district bawrhsap Nazuk Kumar chuan kângmei laka ramngaw leh nungchate him theihna turin Serchhip district-ah silai nena ramvah khap a nih thu a puang.

Kawng siam dawn
PWD chuan vawiin aṭangin Dawrpui Vengthar aṭanga Vaivakawn Zohnuai Pêng inkar kawng an thawm ṭha dawn a, hna thawh chhungin kawng chanve khâr a ni dawn. Hnathawh tibuai thei turin kawngpuiah lirthei leh bungrua dah phal a ni lo.

File ûm zui dawn
MZP chuan, sorkar hnathawk pension tawh rawih nawn tura file kal mek chu an ûm zui dawn thu an tarlang a; sorkar hnathawk pawlte'n pension kum 62-ah tihsan an phût chu ṭha lo an tih thu leh kum 60 chu ṭha tâwk an tih thu an sawi bawk.

Kawng thawm ṭha ṭan
Rural Development minister Lalruatkima chuan INC member C Ngunlianchunga zawhna chhángin, Sabualtlang leh ramri lungphun (pillar no. 10) inkar kawng chu thawm ṭhat hna thawh ṭan a nih thu a sawi a, "BDO, Lawngtlai enkawlna hnuaiah departmental-a thawh tur a ni a, amount cheng nuai 15 a ni," a ti.
Dr ZR Thiamsanga zawh belhna chhangin Minister chuan, House Leader-in a phalsak chuan kuminah silpauline leh rângva sem leh tum a nih thu a sawi bawk.

Ri bengchheng Khuahkhirhna
HSLC leh HSSLC exam a hnaih tawh avang leh zirlaite inbuatsaih nasat lai a nih avangin Lunglei district bawrhsap Ramdinliani chuan ri bengchheng siam chungchangah khuahkhirhna a tichhuak. Ṭul bik thil a nih loh chuan zan dar 10 aṭanga zing dar 6 inkarah khuang, tawtawrawt, amplifier leh ri bengchheng siam thei thil dang hman loh tur a nih thu tarlang a ni.

Skill training
Kolasib DC John LT Sanga chuan nimin khan Kolasib SIRDPR Extension Training Centre-ah Bilkhawthlir leh Thingdawl RD block hnuaia ṭhalaite'n eizawnna tlak thiamthil an neih theih nana buatsaih, skill development training a hawng. Training hi UDPA department, SIRDPR, Divisional Forest Office leh DC Office buatsaih niin, mi 50 an tel a, vawiin leh naktukah chhunzawm a ni ang.

Tablet hlân
Mamit DC Lalnunhlua chuan nimin khan DC conference hall-ah NITI-BYJUs Career Plus programme a hawng a, kum 2021-a BYJUs test paltang Mamit HSS zirlai 12 hnenah tablet a hlân. Tablet dawngtute hi Joint Entrance Test leh National Eligibility cum Entrance Test hmachhawn turin kum hnih chhung a thlawnin training neihpui an ni ang.