RD hnuaia kawng laih chhia a awm kan hre lo; 'Kan ministry lam khuan PMGSY kawng nen an hriat pawlh nasa, Mizoramah chuan PWD hnuai a ni' - RD Minister

16th February, 2023

Nimina Assembly session-ah ZPM Legislature Party leader Lalduhoma'n, tun hnaia sorkar laipuia RD Minister rawn zinin Rural Developent hnuaia kawng laihte a lungawithlâk loh tih a sawi thu a tarlang a; RD minister Lalruatkima chuan RD department hnuaia kawng laih zinga chhia a awm an hriat loh thu a sawi a, sorkar laipui lamin PMGSY kawng nen an hriat pawlh ṭhin thu a sawi.

Lalduhoma chuan, central lam minister rawn zinte'n Mizorama sorkar hnathawh a lungawithlak loh thu an sawi zauh zauh tih sawiin, "RD Minister Niranjan Jyoti lo kal khan RD hnuaia kawng laihte a lungawithlak loh thu a sawi a ni," a ti a, a awmzia RD minister Lalruatkima a zawt a ni.

Lalruatkima chuan, "RD Minister-in kawng laih a chhiat thu a rawn sawi a. Keini chuan kawng laih hi a chhiat àwm kan hre lo. PMGSY nen an hriat pawlh a nih ka ring a... PMGSY hi chu PWD enkawlna hnuaia awm a ni," a ti.

Lalduhoma chuan, Union RD Minister-in PMAY hnuaiah chhungkaw 15,694 in sakna tur central-in an rawn pek vek tawh thu a sawi tih sawiin, "Mizoramah chuan chhungkua 5,800 chauh an la pe a. Kan pek sa hi an hman zawh loh chuan kan pe tawh lo ang, tih a sawi a. Eng nge a awmzia?" a ti a; Serchhip bialah pawh ṭanpuina dawng si loa in sakna tur an dawn lawmpuina lehkha dawng eng emaw zat an awm thu leh, ṭanpuina dawng lote hnenah in sak signboard tàrtir tum an awm thute a sawi bawk.

Lalruatkima chuan, PMAY chu chi hnih - thingtlang leh khawpuiah ṭhen a nih thu sawiin, "Gramin, rural a awm a, urban a awm bawk a, urban hi UDPA-in hma a la a ni. Kan hriat pawlh ṭhin a nih ka ring. RD hmalakna chu thingtlangah a ni," a ti.

In sak ṭanpuina dawng si loa in sak lawmpuina thu central aṭanga dawng an awm nia sawi chungchangah RD Minister chuan, "Khatiang kha keini department-in kan hre lo. Ministry dang hmalakna a nih avangin a hriat pawlh palh ni turah ka ngai. Signboard tàr tih kha kan hre lo a, RD department chuan kan hriatpui lo a ni," a ti.