PM-KISAN aṭanga hnâwl tura rawt zingah sorkar hnathawk leh pensioner 478 an tel

Champhai District Grievances Redressal and Monitoring Commit-tee under PM-KISAN chu an chairman James Lalrin-chhana, bawrhsap hoin nimin khan DC conference hall-ah an ṭhukhawm. Kut hnathawktute ṭanpuina PM-KISAN scheme-a inziak lut hnâwl tura rawt zingah sorkar hnathawk leh pensioner mi 478 an tel.

Ṭhutkhawma tarlan danin, kut hnathawktu, ram nei ngeite'n kum tina bank kaltlanga ṭanpuina Rs 6,000 an dawn theihna PM-KISAN scheme-ah hian Champhai leh Khawbung RD block-a khaw 56 aṭangin mi 10,975 an inziak lut tawh.

Inziak lut zinga 6,656 (60.65%) chu PM-KISAN inkaihhruaina anga felfai taka inziak lut an ni a; mi 4,319 (39.35%) erawh chu PM-KISAN inkaihhruainain a phûtte an zawm loh avangin paih tura rawt a ni.

Chhan hrang hrang vanga dilna hnâwl tura rawt zingah chhungkaw pakhat aṭanga mi pakhat aia tam inziak lut leh awm nawn mi 3,187 an awm a; mahni khua aṭang ni loa inziak lut mi 351, sorkar hnathawk leh pensioner inziak lut mi 478, mitthi tawh 226, ram nei lo mi pahnih leh chanchin chhui zui theih loh mi 75 an awm bawk.

Pradhan Mantri Kisan Samman Nidhi (PM-KISAN) hi kum 2019 aṭangin khan Mizoramah kalpui a ni a, scheme hnuaia inziak lut kut hnathawktu, ram nei ngeite chu kum tin bank kaltlangin ṭanpuina Rs 6,000 pek ṭhin a ni.