BIOCONE Nest Box Project hawn a ni

Biodiversity and Nature Conser-vation Network (BIOCONE) chuan Nest Box Project 2023 an kalpui tur chu February 14, Thawhlehni khan Pachhunga University College seminar hall-ah PUC principal Prof. H Lalthanzara'n a hawng.

Nest Box Project hi ramngaw chereu vanga bu chhehna tur hmun nei ṭha lo sava leh bu chheh harsat sava ten awlsam zawka bu an neih theihna tura sava bu siam chawp (nest box) siama kalpuina a ni. Hawnna inkhawm hi BIOCONE president Vanlalhrima'n a kaihruai.

Prof. H Lalthanzara chuan, Mizoram sik leh sá inthlak dang lam dan te, tuihna tlem tial tial dante aṭangin Mizoram dinhmun a ṭha lo hle tawha a lan thu a sawi a, "Lui tui bawlhhlawhte tifai a, ramngawte humhalh turin mi tin kan pawimawh. Thil chhe tawhte siam ṭha a, hre lo zawkte zirtir zel turin mi tinin ṭan kan lak sauh sauh a ṭul a ni," a ti.

BIOCONE adviser Dr C Lalhmingliana chuan, thing roa bu chhep ṭhin savate tan thing ro awm lohna hmunah bu chheh a har tih sawiin, chuvang chuan sava bu siam chawp dah a pawimawh thu a sawi.

Nest Box Project hawn zawhah PUC ram chhung hmun hrang hrangah sava bu dah nghal a ni. BIOCONE hian kum 2011 aṭangin nest box project an kalpui ṭan a, kum 2022 thleng khan sava bu 300 chuang Mizoram hmun hrang hrangah an dah tawh a ni.