New Market-a in 2 sakna atan cheng 7,841.59 ruahman

Commerce & Industries minister Dr R Lalthangliana chuan, Aizawl New Market-ah bazar in pahnih sak mek a nih thu leh, in pahnih sakna atan cheng 7,841.59 ruahman a nih thu Assembly House a hrilh.

ZPM member Lalchhuan-thanga zawhna chhangin Dr R Lalthangliana chuan, Foreign Lane tih ṭhin hmunah Commerce & Industries hnuaiah Aizawl City Annexe building sak mek a nih thu leh 50% zawh tawh a nih thu a sawi a; New Market main building awmna ṭhina in sak thar tur Aizawl City Centre tih chu Smart City Project hnuaia thawh a nih thu a sawi bawk.

Lalchhuanthanga chuan, New Market-a in thar sak tur pakhat zawk chu October 4, 2018-ah ṭan a nih tawh thu leh kum thum chhunga sak zawh tur a nih thu sawiin, hun tiama sak zawh a nih loh chhan te, a hmaa dawr/seat neite'n seat an chan leh vek dawn leh dawn lohte a zawh belh.

CI Minister chuan, Aizawl City Annexe sakna atan NEDP (Congress sorkar programme) aṭangin cheng nuai 3,641.59 dah a nih thu sawiin, "Restricted tender hmangin contractor thlan a ni a, contractor chu Lushai Engineers an ni. Chak taka hma la turin kan inhrilh," a ti a; a huna sak zawh a nih loh chhan chu, dawr neitute'n an tihkhawmuan vang te, Covid-19 léng leh harsatna dang vangte a nih thu sawiin, sum lam chu harsatna a nih loh thu a sawi.

Dr R Lalthangliana chuan, Aizawl City Centre chu UDPA department hnuaia awm Smart City Project kaltlanga sak tur a nih thu sawiin, "Cheng nuai 4,200 ruahman a ni a, an uluk hle. Sak zawh a nih hunah a hmaa seat nei mi 1,103 dah luh theih an ni dawn. Sorkar tan pawh revenue tam tak lâk luhna a ni dawn a ni," a ti.

CI Minister chuan ZPM member Dr Vanlalthlana zawh belhna, Ramhlun Venglaia district industry office hmunah market leh hall sak tum a nih leh nih loh a zawhna chhángin, theihtawpin hma la mah se, sum hmuh a harsat thu a sawi bawk.