CM-in sorkar hnathawkte a tibeidawng - MPYCC

Mizoram Pradesh Youth Congress Committee (MPYCC) chuan thuchhuah siamin, chief minister Zoramthanga'n sorkar hnathawkte a tihbeidawn thu an tarlang.

Chief Minister-in tun hnaia press conference a neihnaah sorkar hnathawkte hlawh pek hun chungchang tehkhin thua a sawi chuan sorkar hnathawkte a tibeidawng nia sawiin MPYCC chuan, "Sorkar hnathawk tam ber hian an thlabi hlawh hi thla thar tìrah lak an duh vek. Thla kipa man chawi ngai hrang hrang leh loan late tan tlai taka hlawh lak a nih hian kawng hrang hrangin harsatna an tâwk ṭhin," an ti.

MPYCC chuan, a hun taka hlawh lâk an duh tawh laia Finance Minister berin ni 1-a lak leh ni 15-a lak a la tehkhin chuan sorkar hnathawkte a tilungngai nia sawiin, "Sum enkawl thiam lo Finance Minister Mizoramin kan nei hi pawi kan ti hle," an ti a; sorkar hnathawk pension-te pawhin an pension chhuahpui tur sum an khawlte an la thei lo tih an tarlang.

Congress ṭhalaite chuan, Congress sorkar laiin sorkar hnathawkte'n GP fund an mamawh ang zelin an la ṭhin tih an sawi a, "MNF sorkarah chuan vàna rah ang a ni ta hi sorkar hnathawkte ngaih pawimawh lohna lian takah kan ngai," an ti.

Sum enkawl thiam leh tawnhriat ngah Lalsawta chu tun dinhmuna Mizoram sum leh pai tlachhe mek siamṭha tura ramin a mamawh lian ber nia sawiin MPYCC chuan, Lalsawta laka rinna nghat tur leh thláwp turin mipui an sáwm a ni.