Serchhip khawpui faina tur sawiho

Serchhip Town Sanitation Task Force chuan nimin khan additional DC Lalmuansanga Ralte hoin DC conference hall-ah Serchhip khawpui faina atana hmalakna turte an sawiho a; polythene hman phal loh chin hmang luite chak zawka dap chhuah a, na zawka hrem an rêl.

Ṭhutkhawmah hian, chawlhkar khatah ṭum khat bawlhhlawh ṭawih thei bik khawn turin bawlhhlawh paih lirthei tlântir tawh ni se, an ti a; ṭawih thei lo lak khawm ni pawh ni khat dang kalpui an rêl a ni.

VC-te'n an huam chhunga chhungkaw tinte chu in lama an bawlhhlawh hmanga leiṭha siamna (home composting) neihtir vek theih nan MGNREGA hmangin thawh theih a nih thu sawi a ni a; chhungkaw tinte chu bazar bag ṭha tak kenga mamawhlei ṭhin tur leh, dawrkai leh thil leitute chu plastic (polythene) hmang lo turin an ngen.

Bawlhhlawh sâwngbawlna hmun thar Chhiahtlang dáia buatsaih mek hman ṭangkai dan tur te, ODF Plus ni tura endikna paltlang tura hmalakna te, veng tina plastic dah khawmna tur siam dan tur leh faina lama hmalakna tur thilte an sawiho bawk.