Mizoramin Finance enkawltu a nei ṭha lo- PCMizoramin Finance enkawltu a nei ṭha lo- PC

Peoples Conference party hruaitute chuan nimin khan an pisaah Mizoram budget thar an thlirho a; an president Vanlalruata chuan, Mizoramin Finance enkawltu a nei ṭha tâwk lo niin a sawi.

Vanlalruata chuan, Mizoram sum dinhmun a chhiat thu sawiin, "Mizo-ram budget ruahmanna bul tumtu Finance changtu Mizoramin kan nei ṭha tâwk lo a, ram leh mipui tan a vanduaithlak. Kan budget thar hi cheng vbc. 640.01 a indaih lo saa bul ṭan tur a ni nghal a, cheng vbc. 272.33 pûk belh chung pawha kum tawpa cheng vbc. 628.51-a indaih lohna nei tura chhût a ni," a ti.

PC President sawi danin, kum 2021-22 khan sum indaih lohna vbc 123.34 a awm sa a, cheng vbc. 4,595.03 pûk belh a ni chungin kum tawpa indaih lohna chu vbc. 507.48 a ni.

Sorkar kum kal mek 2022-23 ah, kum tirah indaih lohna cheng vbc. 133.09 nei tura chhût niin, vbc. 2,582.54 pûk belh a, kum tawpah pawisa hman bàn vbc. 23.41 nei tura duan a ni. Sum pûk tura ruahman aia tam cheng vbc. 3,197.23 pûk a ni chungin, kum tawpa indaih lohna nia chhût chu cheng vbc. 640.01 a ni.

Vanlalruata chuan, "Kumin kum tawpa indaih lohna tura chhût cheng vbc. 628.51 hi vbc. 1,000 a kai theih hial a rinawm," a ti.