Lok Sabha MP-in Zokhawsang a tlawh Hnathawh a lungawithlak loh - LS MP

Lok Sabha MP C Lalrosanga chuan nimin khan Zokhawsanga Assam Rifles awmna hmun siam mek a tlawh a, Aizawl khawpui aṭanga an insawn chhuah theih loh chhante a enfiah. MP hian hna thawktute hnathawh chu lungawithlak tâwk lo-ah a ngai.

Assam Rifles hotute chuan, an la insawn loh chhan chu quarters sak zawh loh leh sak zawh tawh pawh luah ngam loha chhia tam tak a awm vang a nih thu leh, an ram chhung hmun 15-ah mimalin ram an chuhpui thu an lo hrilh.

AR sipai hotute chuan, tun dinhmunah office building bik chu 90% sak zawh tawh a nih thu leh sipaite chenna tur quarters chu 60% sak zawh a nih thu an sawi a, "April 2020-ah zawh fel theih a nih a rinawm a, in sak zawh tawh zingah ṭha lo a tam avangin sak ṭhat ṭul a awm nual dawn a ni," an ti.

C Lalrosanga hian AR quarters tur sak mekte chu a hmunah a tlawh a, quarters satu Engineering Projects India Limited (EPIL) hnathawh dan chu lungawithlak loha a ngaih thu a sawi. AR hotute sawi danin, Zokhawsanga AR hmunah hian type-II quarters block 19 sak tur-ah 16 sak zawh tawh a ni a, block thum sak mek a ni. EPIL-in in an sakte chu a tira ruahman dan (design) nen a inmil loh thu leh sak zawh tawh sa an hnena hlan an tum pawh an lâ ngam rih lo. In ṭhenkhat chu a beam awm tura ruahman ni mah se, beam awm lo a awm nual a; block tinah chenna in 16 awm tur a nih laiin, block ṭhenkhatah chuan a kim lo. Officer quarters tur sak pawh a ṭha lo hlawm hle a ni.

EPIL-in sipai ram chhunga inkalpawhna kawng (internal road) an siam pawh MP C Lalrosanga chuan a en nghal a; September 2019-a kawng siam zawh tawhte chu a chhe leh tawh hle. Hei vang hian AR hotute chuan Ministry of Home Affairs (MHA) lamah EPIL hnathawh dana an lungawi loh thu an thlen tawh. Lok Sabha MP chuan, Mizoram sorkar leh mipuite'n AR-te an hmun thara an insawn thuai an duh thu leh Union Home minister Amit Shah hnenah pawh amah ngeiin an harsatnate a thlensak tur thu a sawi.