Finance changtu thlak a ngai: Congress

Mizoram Pradesh Congress Committee chuan May 16, Inrinni khan thuchhuah siamin, Mizoram sum enkawltu Finance minister Zoramthanga, chief minis­ter ni bawk chu thlak vat a ngai nia an hriat thu an tarlang a; Chief Minister la ni tho mah se, Finance department chu mi dang kutah dah mai turin an ngen.

MPCC chuan, Mizoram mipui rilrua CM Zoramthanga, Finance minister duhkhawp lohna nasa tak awm mek chu thil àwm taka an ngaih thu sawiin, "Mizoram sum dinhmun dik tak a sawi thei tlat lo leh awmze nei loa cheng nuai tam tak luan ralna sawi mâm a tum tlat hi thil mak, ngaihdam mai theih a nih loh avangin, dinhmun chhe zawka Mizoram a hnuh luh hma ngeiin Finance Minister hi thlak vat a ngaiin kan hria," an ti.

'Mizoram sorkar hi sum leh paiah a harsa takzet em? Sum leh páiah eng nge a dinhmun dik tak?' tih chu mipuia zawhna awm a nih thu sawiin MPCC chuan, "May 12, 2020-a state address a neihah CM Pu Zoramthanga, Finance minister ni bawkin Mizoram sum dinhmun dik tak a sawi thei lo a, Finance minister ni zel tlak a ni lo tih chiang takin a lantir. Sum dinhmun 'Pathian chauhin a hria' tia a chháng pial phei chu mipui zah lohna dik tak a ni," an ti a; Assembly Speaker pawhin a mang­anpui a, MLA-te hnena vehbúr a khawnsak hial niin an sawi.

Congress party chuan, "Mizoram sorkar­in cheng nuai 99 chuang sénga Delhi aṭanga PPE a lei zinga 75% vel hman tlak loh a awm nia tarlan a ni," tiin, chumi chungchangah chuan ACB-ah FIR an thehluh tawh thu an sawi a, "He thilah hian mipui sum cheng nuai tam tak dik lo takin a luang ral ngei tih a chiang. Hei hi Finance Minister chuan a ui em em tur a nih laiin, 'In kâng ṭhelh nan chuan tui nú pawh kan hmang fo,' tia Finance Minister berin awmze nei loa sum luan ral a pawiti lo hi Mizoram mipui tan hriatthiam theih a ni lo," an ti.