Pastor senior-te'n KMMTTP an tlawh

Mizoram chhim lama pastor senior-te chuan PWD hotute kaihhruai­in May 15, 2020 khan Kaladan Multi Modal Transit Transport Project (KMMTTP) kawngpui siam mek Mizorama a tàwpna hmun, Zorinpui (Zochachhuah) an tlawh.

Zochachhuah tlawhtute zingah hian Mizoram Baptist Kohhrana pastor senior Rev. H Killuaia leh Rev. F Sangvela te an tel a; PWD hotute'n KMMTTP kawngpui laih mek te, Zocha­chhuaha sumdawnna hmun tura ruahman Zo­rin­pui-te tlawhpuiin, an hrilhfiah. Pastor-te hian KMMTTP chu ṭawngṭaiin an hlân a ni.

Rev. F Sangvela leh Rev. H Killuaia te hian April 29, 2020 khan Lawng­tlai district khawchhak lama Myanmar nena inrina, Saisih­chhuahah ṭawngṭaina hun an lo hmang tawh bawk.

KMMTTP kawngpui, India ram lama Lawngtlai aṭanga Zochachhuah thleng siam hna chu 90% vel zawh tawh a ni a, Myan­mar ram lamah pawh Mizoram ramri aṭanga laih ṭan a ni tawh. Myan­mar ram lama kawngpui siam hna (project) enkawl tur hian sorkar laipuia Ministry of External Affairs (MEA) chuan chief supervisor atan Col. Ajay a dah.

Col. Ajay-a sawi danin, Myanmar rama Bay of Bengal tuipuia lawng chawlhhmun Sittwe aṭangin Kolodyne (Kaladan/Chhimtuipui) lui lamah Paletwa thleng lawng lian a kal thei tura ngaih a ni a; Paletwa aṭanga Indo-Myanmar ramri Zorinpui inkarah kawngpui lian km. 109-a thui siam tum a ni.

Kum 2017 velah Paletwa lam aṭang kawng sial hna ṭan a ni tawh a, mahse, harsatna hrang hrang vangin chhunzawm a ni lo. Tunah chuan India ram lam, Zorinpui aṭangin kawng sial hna an ṭan leh ta a, kum hnih chhunga awh tura rua­hman a ni.