Horticulture dept. link road laihnaah cheng vbc. 2.94 hman dik loh a awm

Chief minister Zoramthanga'n nimina Assembly session-a a pharh, Report of the Comptroller and Auditor General of India on Social, Economic and Revenue Sectors for the year ended March 31, 2020-a tarlan danin, Horticulture department hnuaia link road laihnaah sum hman dik loh cheng vbc. 2.94 a awm.

CAG report-a tarlan danin, kum 2018-19 khan NEDP sum cheng vbc. 26.73 hmangin Horticulture department chuan departmental-in horticulture link road (all weather road - fûr leh ṭhâla hman theih) an lai a; hna hian kawng thar laih, lung phah, link road awm sa zauh, culvert leh leilâwn siamte a huam.

Link road siamte chu hmun 134-ah zir chian a ni a, chungte chu - Aizawl division hnuaiah 48, Serchhip division-ah 32, Lunglei division-ah 54 a ni. Link road 134 zingah hian cheng vbc. 3.30 sênga siam link road 13 chu CAG Audit Team leh department official-te'n March - April, 2021 chhung khan a hmunah an endik a ni.

Horticulture department chuan Lunglei division hnuaiah link road thar 13 laihna leh kawng awm sa chei ṭhatna atan excavator an hmang a, excavator hman (hire) hun chhung anga tarlan chu hna thawh hun chhung aiin a rei zawk. Heivang hian excavator hman man chu cheng nuai 72.15-in an pe chuang a ni.

CAG hian March 2021 khan link road 13 laihna leh a awm sa chei ṭhatna chungchang bakah, link road 20 laihna senso an endik (cross checked) leh bawk.

Excavator registration number, money receipt leh measurement book chu VAHAN portal nen enfiah a ni a, excavator registration number anga tarlan chu bike, scooter, car etc. number a ni tih hmuh a ni. Hetah hian excavator hire na man angin cheng vbc. 1.10 pek chhuah a ni bawk.

Hei bakah hian CAG chuan hna thawhna hmun 18-ah excavator number anga tarlan, bike, scooter, car etc. ni si hman man atan cheng vbc. 1.12 pek chhuah leh a ni. A vaia link road laihna atana sum hman dik loh awm chu cheng vbc. 2.94 tih a ni.